Siglir tar il cuntegn

Header

cuntegn

Surselva Rempars encunter la bova da la Val Strem

La vischnanca da Tujetsch prenda mesiras là, nua che l’Aua Strem sbucca en il Rain. Plirs rempars duajan proteger ils bajetgs en questa regiun.

Sco il selvicultur da Tujetsch Adrian Deragisch ha declerà ad RTR vegni construì dus rempars per proteger la serenera e trais rempars per proteger la centrala da la Axpo Hydro Surselva. Mo là ston ins laschar liber l’access, vul dir ins vul construir barrieras mobilas.

Demontar punts da la loipa

Ultra da quai vegnan trais punts da la loipa da pass lung demontadas. Mo sin la stagiun d’enviern duain ellas esser puspè en funcziun. La punt sur la tschiffada da la Axpo vegn auzada per 50 cm e quella resta alura. E la punt da fier sper il stan da sajettar vegn navend, ils cabels da polytronica e d’electricitad vegnan mess sut l’ual.

300'000 francs

Tut questas mesiras custan 300’000 francs. Uss vegn il project elavurà en detagl, e las lavurs cumenzan – sche pussaivel – l’atun, uschiglio la primavaira 2017.

Ulteriur material pudess vegnir anc

La saira dals 14 da mars era ina bova vegnida giu en la Val Strem. Crappa e terratsch da passa 200’000 m3 material èn crudadas en la val. Ils geologs quintan che anc dapli material pudess vegnir giuadora.

RR actualitad bunura

Artitgels legids il pli savens