A Schluein sajan pliras chasas abitadas en la zona da privel cotschna, ha il president communal Ralph Schläpfer ditg la davosa sonda a chaschun da l'emprima palada per il nov rempar cunter auas grondas. In'autra part dal territori abità sa chatta en la zona blaua, tranter auter era la chasa da scola, ha il president communal ditg. Il nov rempar da protecziun vegn construì a Cleus circa 300 meters sur il vitg da Schluein. Ralph Schläpfer ha ditg: «Sche nus na faschain nagut, pon grondas bovas periclitar noss vitg e quai malgrà che la val da Schluein è surbajegiada cun passa 90 saivs.» Il president ed ils dus inschigners che accumpognan il project dal nov rempar han declerà a las var 100 vischinanzas e vischins preschents tge che capita ils proxims onns cun il territori per lung da la val sur la vischnanca.
Necessari malgrà rempars existents
Il privel acut e duas evaluaziuns dals rempars existents ils onns 2013 e 2020 han tenor il messadi da la vischnanca a la populaziun mussà ch'i saja necessari da construir in rempar pli grond che garantescha la segirezza a lunga vista. «Senza mesiras da protecziun supplementaras vegn il privel a crescher entras il nausch stan dals rempars existents», ha Benno Zarn, inschigner dad ovras idraulicas, declerà. Cun las mesiras da protecziun planisadas vegnia la segirezza cunter las auas grondas augmentada marcantamain. Tenor il messadi da la vischnanca pudessan las surfatschas dal territori d'abitar ch'èn actualmain periclitadas vegnir stritgadas ord il territori da privel.
Rempar adattà per Schluein
Sco quai ch'igl è vegnì ditg la sonda passada a Schluein hajan ins en il rom d'in studi examinà differents concepts da protecziun cun differents elements, mesiras e cumbinaziuns pussaivlas. Da l'evaluaziun resulta che il concept da protecziun consista da la sanaziun da circa 50 saivs en la Val da Cafegns ed en la Val da Schluein e da las saivs grondas a Parlet. In ulteriur element da la sanaziun saja in nov chanal per retegnair bovas a Cleus gist sur Schluein. Quest chanal ha tenor l'inschigner Raphael Wyrsch in volumen da tschiffada da 55'000 m³ e sa cumpona d'ina deponia che sa referescha al project, da l'engrondiment dal chanal da svidada a Schluein sco era d'in rempar avant la sbuccada en il Rain Anteriur.
I restan set milliuns francs
L'euforia durant la palada a Schluein n'è chapiblamain betg stada uschè gronda sco d'ina palada per in edifizi en vischnanca. Era ils pleds dals referents e dal president communal han confermà ch'ins stoppia ussa far quella investiziun e ch'i sa tractia en emprima lingia da la segirezza futura da la populaziun da Schluein. Ils custs per realisar il project da protecziun cunter l'aua gronda muntan a 23 milliuns francs. Tenor il messadi da la vischnanca sa participescha il chantun cun var sis milliuns francs per la protecziun da la via chantunala. Ils ulteriurs 17,48 milliuns francs vegnan subvenziunads da la Confederaziun e dal chantun cun passa 60%. Uschia han las vischnancas anc da finanziar set milliuns francs. A la sanaziun da las saivs sin il territori cumpiglià dal rempar vegnan las vischnancas dad Ilanz/Glion e da Falera a sa participar. Las lavurs da construcziun entschaivan ils proxims dis. Ellas succedan en etappas e cuzzan circa quatter onns.