Requirents d’asil a Mustér gidan e survegnan agid

A Mustér sa gidan requirents d’asil dal center da transit Bellavista cun ils cussadents da la chasa da tgira, ed indigens gidan ils requirents d’asil d’emprender tudestg.

Laschar ir video «Mustér ed ils requirents d’asil»

Mustér ed ils requirents d’asil

3:12 min, Telesguard dals 9.12.2016

Dapi intgins mais sa gidan requirents d’asil en la chasa da tgira Puntreis. Els dattan per exempel da baiver als cussedents, van a spass cun els u s'occupan simplamain dad els.

L’iniziativa è vegnida da la chasa da tgira Puntreis. Sco il gestiunari Diego Deplazes di, saja l’eco stà grond cura ch’i hajan dumandà sch’ils requirents veglian sa gidar. A la chasa da tgira giaja quai betg da remplazzar il persunal cun persunas che fan lavur voluntaria, mabain per sa gidar tar l’integraziun, punctuescha Diego Deplazes.

Sursiglir cuntegn supplementar

Nazret Tezazu

Nazret Tezazu
  • Eritrea
  • 24 onns
  • studenta da psicologia
Sursiglir cuntegn supplementar

Yahya Rahimi

Yahya Rahimi
  • da l'Afganistan
  • 22 onns
  • aveva in restaurant

Requirents gidan gugent

Per ils requirents d’asil è quai ina lavur bainvegnida. Sco Yahya Rahimi di, n’hajan els nagina plazza ed uschia bler temp. Be durmir e mangiar na saja betg bun per el. Sch’el possia far ventiraivel insatgi saja era el ventiraivel. Era Nazret Tezazu di ch’ella gidia perquai ch’ella veglia gidar la glieud e perquai che la glieud gidia ella.

Il problem per els è la lingua. Era Diego Deplazes conferma che quai saja ina sfida. Ils collavuraturs stoppian prender temp da declerar las lavurs ed hajan tut tenor era da far quai pliras giadas fin ch’ils requirents chapeschian. Tar ils cussedents saja quai però savens betg in problem. Tscherts cussedents na communitgeschian betg pli verbal ed uschia na saja la lingua era betg in grond problem.

Pudair discurrer cun indigens è impurtant

Ma gist cun la lingua survegnan ils requirents d’asil era agid. Entant ch’els fan lavur voluntaria per ils cussadents en la chasa da tgira, fan indigens lavur voluntaria per els cun dar instrucziun da tudestg.

Uschia per exempel Tabea Baumgartner. Ella haja gì la pussaivladad dad ir bler a scola e quai veglia ella ussa dar vinavant. Vitiers vegni ch’ella saja stada bleras giadas en l’exteriur e saja adina vegnida prendida si là curtaschaivel e tuts hajan gidà. Ussa haja ella la chaschun da gidar. «La lingua è la clav per pudair viver en in pajais» di ella.

Per ils requirents d’asil èsi impurtant da pudair discurrer tudestg. Uschia possian ins era dir quai che giaschia sin il cor, di Yahya Rahimi. Els discurrissan gugent cun la glieud indigena perquai ch'i saja grev per els, damai ch’els sajan qua senza famiglia e lunsch davent da la patria.

Ils emprims pass da vegnir en contact cun la glieud indigena èn fatgs. Cun sa gidar e far il curs da tudestg èn dadas las premissas per vegnir en contact.

RR actualitad 07:00