Siglir tar il cuntegn

Header

Requirent d’asil che sesa sin in letg en ina localitad sutterana dal militar.
Legenda: Ils requirents prendan dimora en las localitads sutteranas dal militar. Keystone
cuntegn

Surselva Requirents d’asil turnan sin il Lucmagn

Il center per requirents d’asil sin il pass dal Lucmagn vegn puspè activà. Igl è planisà dad avrir il center a partir dals 27 da fanadur fin ils 18 d’october 2015.

La vischnanca da Medel ha acceptà ina dumonda dal uffizi federal da migraziun. Suenter la stad 2013 è quai gia la segunda giada che las localitads sutteranas dal militar vegnan duvradas sco dimora per requirents d’asil. Quants requirents che vegnan plazzads sin il Lucmagn n’è anc betg conuschent. Mo segir è che umens giuvens vegnan.

Program d'occupaziun

Sco il president da vischnanca da Medel Peter Binz ha ditg al Radio Rumantsch, sajan els vid preparar in program d’occupaziun per ils requirents d’asil, vul dir ch’els pon puspè far tschertas lavurs sco reparar vias e sendas ubain schubregiar pastgiras e guauds. Era las mesiras da segirtads èn sumegliantas sco il 2013. Plinavant hajan els gia infurmà las autoritads dal Tessin.
Avant dus onns na veva quai betg dà problems ubain reclamaziuns, saja quai cun ils requirents d’asil ubain cun ils abitants.

Confederaziun tschertga schliaziuns

La Confederaziun di pauc da quest project. L’uffizi per migraziun ha tramess ina communicaziun a RTR. En quella èsi scrit ch’els lavurian intensivamain cun chantuns e Confederaziun per mitigiar la situaziun critica en ils centers da recepziun. En il focus stettia era da schlargiar las capacitads dals alloschis temporars.

Nagin center d’asil a Sur en Valragn

A Sur/Sufers en Valragn na datti il mument betg in center d’asil. Il president da vischnanca Peter Lechner ha ditg a RTR che la Confederaziun n’haja era betg dumandà la vischnanca. Il center d’asil era vegni duvrà il 2013 sco center per requirents d’asil, silsuenter ha il militar duvrà sez las localitads.

L’uffizi federal per migraziun ponderescha d’avrir alloschis temporars, quai per auzar la capacitad en ils centers federals. L’uffizi communitgescha alura las decisiuns ensemen cun las autoritads chantunalas e communalas.

RR novitads 12.00

Artitgels legids il pli savens

Scrollar a sanestra Scrollar a dretga