Siglir tar il cuntegn

Header

audio
Contribuziuns dals 23.01.2022
Or da Sport ed actualitad dals 23.01.2022.
laschar ir. Durada: 3 minutas 47 Secundas.
cuntegn

Resort Dieni La vischnanca da Tujetsch vul far ils pensums

L'Andermatt Swiss Alps vul realisar a Dieni in resort cun radund 1’800 letgs, repartids sin 3 hotels e pliras chasas d'abitaziuns administradas. La dumonda da construcziun duai vegnir inoltrada sin la fin da mars. Fin uss manca dentant in investider supplementar ed in gestiunari.

La vischnanca da Tujetsch vul evitar sbagls en connex cun la lubientscha da construcziun per il resort a Dieni. Perquai ha ella furmà ina gruppa da lavur che sa fatschenta cun ils pensums. In da quels è la situaziun da traffic. Uschia svaneschian a Dieni ils parcadis actualas da las pendicularas e quels ston vegnir remplazzads, ha declerà il president communal Martin Cavegn durant la preschentaziun da la gruppa da lavur. Era sajan da schliar ils pensums en connex cun las auas e reveder la lescha vertenta, ma qua dapertut sajan ins gia en contractivas e en planisaziun. Tuttina saja il tempo giavischà da l’Andermatt Swiss Alps ina sfida per la vischnanca, accentuescha Martin Cavegn. Midar zonas existentas dovria ses temp, ma surtut saja d’evitar sbagls.

Reveder leschas e midar zonas dovra temp

La situaziun saja che l’Andermatt Swiss Alps vegnia ad inoltrar la dumonda da construcziun la fin da mars e che la vischnanca veglia conceder la lubientscha, sco giavischà, sin la fin d’avust. La construcziun duai lura succeder en dus onns, uschia saja planisà da construir cun elements prefabritgads. Tuttina dettia quai pliras sfidas nunponderadas. Uschia per exempel nua ir cun il material, u era nua plazzar tut las maschinas da construcziun, quai surtut perquai ch’il chantun saja londervi da construir quasi al medem lieu la via principala tranter Dieni e Tschamut e dovria era plaz. Er la situaziun da traffic, cun massa camiuns na saja anc betg ponderada, uschia Martin Cavegn.

Evitar ch’ils indigens n’han betg plaz d’abitar

Ina da las midadas dal project è che las chasas da persunal han stuì far plaz a dapli abitaziuns administradas, ha ditg Martin Cavegn. Quai muntia che las radund 70 persunas che duajan vegnir emploiadas, duvrassan plaz d’abitar. Perquai veglia la vischnanca immediat vegnir activa e cumprar pliras parcellas per pudair lura metter a disposiziun ellas ad indigens en il dretg da construcziun u construir chasas da pliras abitaziuns e laschar a tschains ellas. Ma la vischnanca stoppia agir svelt, surtut sch’ins observi la situaziun vi da tschella vart dal pass Alpsu a Andermatt, nua ch’ils indigens na chattian betg pli abitaziuns pajablas, lura saja in tal scenari exnum d’evitar, uschia Martin Cavegn.

RTR novitads 12:00

Artitgels legids il pli savens

Scrollar a sanestra Scrollar a dretga