Il resort Pradas a Breil è ina istorgia da success. Surtut bleras famiglias vulan far vacanzas en il resort che sa chatta gist sper la staziun a val da las pendicularas da Breil. Cun quai che l’occupaziun è fitg buna e quai constat sur ils ultims tschintg onns, vul la societad uss realisar la segunda etappa. Uschia ha ella inoltrà a la vischnanca la dumonda da construcziun che vegn publitgada proximamain.
Planisà tschintg ulteriuras chasas
La segunda etappa prevesa la realisaziun da tschintg chasas ed ulteriuras 30 abitaziuns da vacanzas. A la fin da la realisaziun da la segunda etappa ha il resort Pradas uschia 21 chasas cun 113 abitaziuns da vacanzas ed en tut 620 letgs administrads, scriva la societad Anavon Brigels. La segunda etappa duai vegnir realisada entaifer ils proxims dus onns, ha confermà Hansueli Baier, il vicepresident dal cussegl d’administraziun. Era planisà è in restaurant en il resort, quel manchia fin uss. Perquai hajan blers restaurants en il vitg savens surcapacitads e uschia possian ins porscher a tut quels giasts ina pussaivladad da ir a mangiar era en il lieu, accentueschan ils responsabels.
Era en il territori da skis vegn investì
La societad vul realisar fin il 2024 anc plirs projects, era en il territori da skis. Uschia è planisà da remplazzar la sutgera che maina en il territori da skis, quella duai ir sper il restaurant Burlaun ora, fin a la Alp Dado. Quest restaurant sin l’Alp Dado duai era vegnir renovà e fatg pli attractiv, surtut endadens duai dar dapli plaz per ils giasts. Ultra da quai duai la sutgera Cauma vegnir remplazzada cun in runal, accentuescha Hansueli Baier. Uschia duai il territori da skis da Breil esser pli attractivs e moderns fin il 2024.