Siglir tar il cuntegn

Header

cuntegn

Restricziuns abolidas Puspè suar senza mascrina

Cun l'aboliziun da las mesiras da corona po la clientella puspè suar senza mascrina en ils centers da fitness. Uschia era en il «Vitafit» a Glion. Il plaschair è grond, da finalmain puspè pudair ir a suar senza mascrina.

Ils centers da fitness eran fermamain pertutgads da la pandemia. Duas giadas han els stuì serrar las portas. Suenter la reavertura hai gì num: obligatori da certificat e mascrinas. Ils centers da fitness svizzers han gì fin 40% pli pauca clientella, il «Vitafit» a Glion schizunt passa 50%. Ussa finalmain pon ins puspè ir a suar senza restricziuns, e surtut senza mascrina.

audio
Averturas: En il fitness Glion senza restricziuns
ord Actualitad dals 21.02.2022.
laschar ir. Durada: 3 minutas 49 Secundas.

Levgiament extrem

I saja in fitg grond levgiament da puspè pudair lavurar sco pli baud, di il possessur e manader dal «Vitafit» a Glion Tarzisi Arpagaus. Ussa possia el finalmain simplamain far la lavur, e na stoppia betg pli controllar certificats u esser il policist che haja da guardar sch'ils clients hajan si la mascra correct. Ed er tar la clientella sentia el, che la situaziun nova saja fitg empernaivla.

Nossa clientella vegn dad esch en cun fatscha riainta.
Autur: Tarzisi Arpagaus «Vitafit» Glion

I dettia però er vuschs precautas e clientas e clients che laschian anc si la mascrina per trenar. La clientella turnia en il fitness, ma ils ischs na vegnian betg sfratgads en. Suenter dus onns restricziuns e prudientscha dovria in pau temp per puspè survegnir fidanza.

Restar positiv

Suà ha era Tarzisi Arpagaus, surtut tar il segund lockdown. El aveva suttascrit il contract per las novas localitads en il bajetg da l'anteriur Coop a Glion – tschains traidubel. Quints per novs apparats da fitness che duessan vegnir pajads, ed entradas nulla. El saja dentant adina restà positiv. Da cifras concretas e perditas na vul Tarzisi Arpagaus explicitamain betg discurrer – cun quest tema haja el s'occupà avunda. El guardia pli gugent enavant ch'enavos.

Jau sun persvas 100% che nus avain gist cun las localitads novas ina buna basa, ch'ins po guardar optimistic vers il futur.
Autur: Tarzisi Arpagaus «Vitafit» Glion
In um cun chavels curts e t-shirt nair, davosvart intgins indrizs da fitness.
Legenda: Tarzisi Arpagaus, il schef dal Vitafit a Glion. RTR, Giana Maria Cantieni

RTR actualitad 08:00

Artitgels legids il pli savens

Scrollar a sanestra Scrollar a dretga