Las ovras da Linus Flepp èn creadas cun l'olma ed èn uss vegnidas rimnadas en ina retrospectiva. Uschia ha il graficher Marius Hublard cumbinà las ovras multifaras da Linus Flepp cun text en ina publicaziun. En «l’ediziun Rein» è cumparida quella retrospectiva cun integrar las spartas principalas da l’artist. E las ovras da Linus Flepp èn en l’emprima lingia per el sez. Uschia possia el guardar pliras uras sin sias ovras e filosofar, u ch’el prendia colur alva e surmalegia els puspè, di il scolast pensiunà. Quai sajan ses maletgs, ch’el na stoppia betg vender, quai saja in cletg. Tuttina haja el era vendì intginas ovras, di Linus Flepp, ch’è creschì si a Curaglia.
Cubissem, senza esser confurm a trends
Cumenzà a dissegnar haja el gia sco uffant. Ma alura haja el sa furmà autodidactic ed uschia cumenzà ad abstrahar ses maletgs. Ma betg da memia, uschia saja adina da vesair u in carstgaun u autras chaussas, e mintgin haja la pussaivladad da pudair filosofar sur da ses maletgs. Uschia saja el gia stà surstà sur da las filosofias che persunas sappian far sur da ses maletgs. Tuttina na veglia el betg plaschair ad insatgi cun ses maletgs, surtut betg ad ina giuria. Quai na saja betg ses mund, era pertge ch’el saja adina restà sasez.
Linus Flepp e si'exposiziun a Segnas
-
Bild 1 von 5. Ina part da l'exposiziun a Segnas. Bildquelle: RTR, Gionduri Maissen.
-
Bild 2 von 5. Il cubissem ha inspirà Linus Flepp. Bildquelle: RTR, Gionduri Maissen.
-
Bild 3 von 5. Duas ovras da l'exposiziun a Segnas. Bildquelle: RTR, Gionduri Maissen.
-
Bild 4 von 5. Ina part da las ovras en l'exposizun a Segnas. Bildquelle: RTR, Gionduri Maissen.
-
Bild 5 von 5. L'atelier da Linus Flepp en la chasa da scola a Segnas. Bildquelle: RTR, Gionduri Maissen.
Bleras ovras sacralas e vid chasas
Linus Flepp è enconuschent a Mustér e conturn, pertge ch’el ha malegià plirs maletgs sin chasas privatas u uffizialas. Uschia per exempel sin chasas da scola, chasas communalas ed era sin chasas dal militar. Quellas ovras han fatg enconuschent Linus Flepp en la regiun. Era ses engaschi sco illustratur da pliras gasettas, placats per concerts ed occurrenzas, ma era ses cudeschs d’uffants èn enconuschents, ma surtut sias caricaturas, ch’el fa mintgadi almain ina.
Duas exposiziuns
A Segnas en la chasa da scola, nua che l’atelier sa chatta, è da vesair in'exposiziun cun ina schelta da sias ovras, quai durant il mais d’avust e parallel è da vesair a partir dals 15 d’avust fin ils 15 d’october in'exposiziun surtut cun sias ovras sacralas en la claustra a Glion.