La revista Annalas pon ins gia leger online; ed en in onn duain era il Glogn e l’Ischi esser accessibels gratuitamain a mintgin en l’internet. Quai sut l’adressa: www.e-periodica.ch
Ils chalenders en general e l’Ischi sco organ dad ina societad èn liads stretgamain cun il moviment rumantsch.
Quests chalenders e revistas eran lieus per far fatg debattas identitaras, debattas linguisticas e debattas litteraras, ma era per publitgar artitgels istorics, sur da noss usits e nossas tradiziuns sco era per ex. necrologs. Sche nus tschertgain oz infurmaziuns biograficas, chattan ins quellas savens en l'Ischi u en il Glogn, di Rico Valär, professur a l’universitad da Turitg.
Paul Luziet, Brulf ubain Ina fiera da Ligiaun
Il Glogn è vegnì fundà il 1927 da Guglielm Gadola ed Antoni Schmid sco «chalender dal pievel» ed «annalas per istorgia, litteratura e cultura rumantscha» (i dat dentant era las annadas veglias da 1867 – 1869 dal Glogn).
Guglielm Gadola è stà il redactur dal Glogn dal 1929 fin il 1953.
Perquai ch’il Glogn vegniva stampà tar Maggi a Glion ha in descendent da la famiglia editura, Dominik Dosch, stuì dar ils dretgs per metter online questa revista. Las istorgias enconuschentas da Guglielm Gadola èn tranter auter: Paul Luziet, Brulf ubain Ina fiera a Ligiaun.
Tgirar e promover linguatg e cultura rumantscha
L’Ischi è l’organ da la Romania (dapi 2006 Surselva Romontscha). Quel è vegnì fundà il 1896 da Caspar Decurtins. La finamira era ed è restada da tgirar e promover la lingua e la cultura rumantscha sursilvana. Ils dretgs da metter el online ha la Surselva Romontscha stuì dar.
Quest project digital fa l’universitad da Turitg en collavuraziun cun la Biblioteca naziunala ch'è responsabla per la part administrativa e finanziala e cun la Biblioteca da la Scola politecnica federala a Turitg ch'elavura las datas.
RTR actualitad 12:00