Siglir tar il cuntegn

Surselva Rico Tambornino ed il scutinem da las olmas

Il nov cudesch da Rico Tambornino tracta in mazzament ch'è capità 1847 a Trun. En la segunda part raquinta el era sur da schabetgs da sia uffanza. Edì il cudesch «Il scutinem da la olmas» ha la Chasa Editura Rumantscha.

Rico Tambornino.
Legenda: L'autur Rico Tambornino. RTR

L’emprima part dal cudesch tracta il mazzament da Maria Catrina Derungs da Trun. L’assassin è l’um che ha mess en speranza ella: Giachen Condrau Spescha (1821 – 1847). El vegn truà a la mort ed executà 1847 a Cuira. Dapli da quest tema pudais Vus tadlar sin nossa pagina d’internet: L’assassinat da Maria Catrina Derungs da Trun.

11 raquints da l'uffanza

La segunda part cuntegna 11 raquints, als quals Rico Tambornino ha fatg in prolog sut il titel: Las olmas en la chasa da miu tat. En quest prolog declera l’autur co ins po chapir ils raquints:

La glieud qua si di alura spert gea uss enconusch jau questa persuna, quai è quel e quel. Cler che quests fatgs sa basan il pli bler sin schabetgs concrets, dentant hai jau maschadà in pau las persunas.
Autur: Rico TamborninoAutur
Il cudesch «Il scutinem dallas olmas».
Legenda: Il cudesch «Il scutinem dallas olmas». RTR, Hubert Giger

Reverenza als antenats

En ses raquints tracta el eveniments en ina chasa cun blers augs ed anc pli bleras ondas. Ils raquints portan titels sco: «Cura che la tatta gieva a prender penetienza», «Ils Talians vegnan», «Ils sontgs en la chasa da mes tat», «L’um cun il Kudelsky» ubain «La tatta, il resti suten e la moda da l’aug».

Da lezs dis mava in viagiatur tut special per nossa tiara entuorn. El vendeva ni resti da letg ni cravattas ed era buca etgs e pumadas ni schiglioc enzatgei. Mo semegliont ad in cumiss empruava el da perschuader sia clientella, en siu cass da cantar avon in microfon da tuttas sorts canzuns, religiusas ed autras, il pli bugen veglias. Las melodias vegnevan registradas dad in terment apparat marca Kudelsky plein nuvs e cun ina cazzoletta verda che tremblava duront che duas flisellas giravan.
Autur: L'Um cun il KudelskyIl scutinem dallas olmas

Cun la vegliadetgna hajan ins in pau distanza ed ins guardia enavos cun auters egls, di Rico Tambornino. El haja sa spruvà da scriver ils texts cun ina tscherta reverenza visavi ils antenats. El n'haja betg vulì esser critic envers els.
Las ideas sajan vegnidas per ex. durant ch’el gieva a spass; ed alura po quai dar tschertas construcziuns ordlonder. E tuttenina saja el sfurzà da scriver e quai saja ina stoda chaussa, perquai ch’ins stoppia far enavant e scriver.

La vernissascha dal cudesch è gievgia ils 30 d’avust, en la sala da cultura a Trun.

RR actualitad 11:00