Il geolog d'agl uffizi da construcziun bassa Christoph Nänni cumpareglia l'entira val cun ina ruschnera che è emplenida cun crappa e material liber che staupa giudim sin la via da Riein. Ins na sappia betg ir cun il material giudim e quai fa questa lavur fitg difficila.
La finamira è da schubregiar ora l'entira val uschia che i sa vegnir suenter nagut pli. Dis da bell’aura sa vegnir transportà davent da quai da 600 meters cubics, rodund 50 autos da vitgira. En tut san ins quintar che i vegn a dar ver 1'000 chargias cun autos da vitgira fin che ils 12'000 meters cubics material en davent.
Marcus Valaulta, il manader dal district sis d’agl uffizi da construcziun bassa, è persvas, che questa part da la via da Riein vegn ad esser segira suenter questas lavurs da rumida.
La bova dils 29 da matg ha chaschunà custs da rodund 800'000 francs per rumir e per metter en urden la via existenta.
Ils da Riein ston spetgar anc ina giada sis emnas fin che la via vegn averta. Enstagl da 7 kilometers ni 15 minutas han els uss in viadi a Glion sur Dutga, in viadi da 20 kilometers e bunamain 45 minutas. Sco quai che Marcus Valaulta ha detg hajan ils da Riein chapientscha per la situaziun.