Uschè blers voluntaris sco quest onn haja quai anc mai dà, scriva la Gruppa Arena Alva en ina communicaziun. La sonda passada han 425 persunas gidà da prender ensemen merda ch'è stada enavos suenter la stagiun d'enviern sin il Crap Sogn Gion e conturn. Sco la Gruppa Arena Alva communitgescha hajan ils voluntaris rimnà en tut 40 meters cubic rument. Quai correspunda a 16 tonnas material.
Quai è stà la tschintgavla ediziun dal «Clean up Day» en il territori da Laax. L'emprima giada avevan 70 persunas fatg part a l'acziun da far urden. L'interess crescha mintg'onn.
Rument daventa ovra d'art
Tut il rument ch’è vegnì rimnà la sonda passada vegn transformà uss da l’artista Ursula Stalder en in’ovra d’art. Quella vegn lura exponida la stagiun d’enviern proxima en la «Casa Melna» a Flem.
RR novitads 16:00