Johann Clopath che stat a Trin ha scrit in cudesch sur dal construider da punts persas. Il cudesch ha 500 paginas e cuntegn passa 400 fotografias – surtut en nair ed alv – graficas e plans.
Tar el deva quai duas construcziuns: Quai è pussaivel u quai n'è betg pussaivel. Sch’el scheva quai è pussaivel, alura na deva quai naginas discussiuns.
Records mundials
Risch Coray ha construì punts persas cun records mundials. L’emprima saja stada quella da Gmünder en il chantun Appenzell (1907) cun in artg dad 80 meters, di Johann Clopath. In auter record è la punt persa per la Viafier retica dal viaduct da Langwies cun in artg da 100 meters. Ed in ulteriur record è la punt persa da lain sur la Tara, in flum en il Montenegro (1939). Quella aveva el planisà cun ses figl ed ella era 141 meters auta, la pli auta che saja insumma vegnida construida insacura sin il mund fin oz, di l’autur dal cudesch.
Sistem Coray
Risch Coray è naschì 1869 a Trin e mort 1946 a Tavau. El aveva fatg l’emprendissadi da scrinari e lainari e studegià al tecnicum a Winterthur. El ha era sviluppà in agen sistem da construir. Coray cumenzava fitg a bass a construir punts persas e gieva per lung dal pilaster siadora, declera Johann Clopath. Quai deva in’autra stabilitad a las punts persas.
Blers artitgels da Hans Erni
Johann Clopath ha retschertgà gia en connex cun il giubileum da 150 onns dapi la naschientscha dal tecnicher da punts. El haja constatà ch’i dat blers artitgels sur da quest um, scrits dal musicists e cumponist Hans Erni. El era er da Trin, creschì si quasi cun Coray ed ha accumpagnà el l’entira vita.
Jau hai duvrà passa 40 citats dad artitgels che Hans Erni aveva scrit.
Il cudesch vegn stampà en 1'800 exemplars. La vernissascha è ils 29 d’october a Trin.
Ord l'archiv
