La band «No Future» datti dapi 22 onns ed en quest temp ha ella publitgà tschintg albums da studio, l'album «XII» inclus. Plinavant ha la band sunà passa 250 concerts en quest temp e sviluppà ses agen «sound» che la band numna «Brass-Rock». Quai vul dir, ella suna in maschaida da Rock, Ska e Funk, e quai cun instruments da flad. Ils commembers èn Samy Schmid, il chantadur e ghitarrist, Andri Arpagaus, il bassist, Armin Candrian, il battarist e Fabian Sgier, il posaunist. Sco osp suna Remo Derungs trumbetta. Tar mintga chanzun dal nov album èn ils instruments da flad d'udir.
Nus avain instruments da flad sin mintga chanzun dal nov album, tge ch'è spezial.
«No Future» ha registrà il disc en ils studios da renum, Powerplay, a Maur. La band haja prendì peda da sviluppar las chanzuns. En quest studio hajan els pudì sa retrair dal mund exteriur per in curt temp. Il resultat preschenta la band ussa. Sonda, ils 15 d'avrigl, suonda il batten dal disc en l'aula da la chasa da scola a Glion. Sco pregruppas sunan «Dario Hess e Band» e «Petta Pagada». Silsuenter datti ina festa cun DJ.
Quella giada han ils tocs pudì madirar pli fitg.
Sch'i va per cumponer la musica e scriver ils texts è surtut il chantadur e ghitarrist Samy Schmid a la batgetta. El scriva texts en tudestg svizzer, englais e rumantsch. Per il nov album ha el dentant scrit texts exclusivamain en tudestg svizzer, sia lingua materna. Cun il bassist Andri Arpagaus ha «No Future» in musicist ch'è vi da studegiar musica, tge che vegn dabun a la band e surtut als musicants d'instruments da flad.
«No Future» suna ils 5 da matg tar RTR en la Late Lounge.
Or da l'archiv:
