Siglir tar il cuntegn

Surselva Roger Widmer – il nov dirigent da l’emna da chor a Breil

Il tenor Roger Widmer da la gruppa „I Quattro“ surpiglia la batgetta da Paul Steiner.

Roger Widmer en acziun.
Legenda: Roger Widmer en acziun. www.frauenchor-bubikon.ch

Davent dals 17 enfin ils 24 da fenadur ha lieu la 21avla emna da chor a Breil. Suenter che Paul Steiner ha organisà e manà quell'emna ils ultims 20 onns, ha Roger Widmer surpiglià quest onn per l'emprima giada la batgetta.

Roger Widmer è oriunds da Wetzikon el chantun Turitg ed ha studegià chant a la scola auta da musica a Turitg. El lavura sco solist, scolast da chant e dirigent ed è in dals tenors da la gruppa "I Quattro". L'emna da chor a Breil è per el insatge tut spezial – betg mo pervia dal chant, mabain era perquai che la gruppa passenta l’entira emna en il medem vitg. Sper las emprovas da chant datti numnadamain era in program accumpagnant cun excursiuns ed activitads sportivas.

Glina e notg

Il motto da sia emprima emna da chor è “Glina e notg”. Quest tema saja sa sviluppà ord ina idea per il program accumpagnant. Cura ch’el eri vi da rimnar ideas per quai program, ha Roger Widmer vis, ch’i è glina plaina durant l’emna da chor.

Impressiun dal concert final 2015.
Legenda: Impressiun dal concert final 2015. mad

El ha decidì d’organisar ina spassegiada da glina plaina e studegià, tge chanzuns ch’el pudess chantar durant quella spassegiada. Uschia è l’idea creschida e la finala saja quai daventà il tema da l’emna da chor.

RR actualitad 07:00