Roland Huber va en pensiun

4 onns è Roland Huber stà directur da Surselva Turissem SA. La fin dal mais va el en pensiun – almain sin il palpiri.

Roland Huber Bild in Lightbox öffnen.

Legenda da maletgs: Roland Huber sa legra da pudair ir en pensiun. RTR, G. Hosang

Roland Huber po guardar enavos sin 40 onns experientscha sin il sectur dal turissem. Da quai ha Surselva Turissem SA profità durant ils onns che Roland Huber ha timunà l’interpresa . En ils quatter onns sajan vegnidas introducidas las novas taxas e la nova lescha per las taxas turisticas. Plinavant saja la structura dal manaschi vegnida adattada uschia ch’i saja pussaivel da far cunvegnias da prestaziun cun las vischnancas ed i saja vegnì creà quatter centers d’infurmaziun cun mintgamai in manader, declera Roland Huber vinavant.

Cuntent cun quai ch’el ha cuntanschì

Tenor Roland Huber saja quai grategià da posiziunar la destinaziun e la destinaziun vegnia percepida sco tala e resguardada da las destinaziuns vischinas sco partenari. Quai che Roland Huber deplorescha è ch’i n’è anc betg reussì da vender meglier il Rain communablamain cun las autras destinaziuns enturn il Rain. En il turissem da la Surselva vegnia quai anc adina patratgà vid singulas destinaziun e betg vid l’entira Surselva. Quai impedeschia la collavuraziun.

Roland Huber è dentant cuntent cun quai ch’el ha cuntanschi. La destinaziun saja sin ina buna via ed i haja collavuraturs capabels en l’interpresa uschia ch’el è persvas ch’i va bain vinavant. In successur per Roland Huber na vegni betg buc a dar en il mument. Marcus Caduff, il president dal cussegl d'administraziun ed Anja Beivi furman la giunta da Surselva Turissem SA.

Carriera

onn
occupaziun
1977directur da cura a Vulpera
1984manader da fatschenta Allod Ferien Chur
1986directur da cura a Laax
1988marketing pendicularas Crap Sogn Gion, Laax
1990directur uniun da cura Scuol
1992manader da fatschenta Bogn Engiadina Scuol
1996directur Scuol Tourismus SA
1999schef voluntaris CM da skis 2003 San Murezzan
2001directur da cura a.i. citad da Baden
2002directur Adelboden Tourismus
2002manader general dal project Alpenbad Adelboden
2008CO Euro Berna 2008 schef center da voluntaris
2012manader da fatschenta Surselva Turissem SA
plinavantpresident uniun Alpine Wellness / president lieu da bogns grischuns / president Forum 50 plus / manader da fatschenta weltcup.ch / suprastonza Federaziun svizra dal turissem e directurs da turissem / president dal CO Tour de Suisse Laax, Scuol ed Adelboden

RR actualitad bunura e mezdi