Siglir tar il cuntegn

Header

cuntegn

Surselva RTR si d’alp: Tranter maschina da mulscher e chaldera

La stagiun d’alp 2016 va plaunet a fin. Bel e bain fin mez settember èn ils animals anc si d’alp e fin lura vegni era anc fatg chaschiel. Avant la stgargiada visitain nus il signun Patrick Albrecht sin l’alp Stavonas sur Sursaissa e survegnin in’invista en il mintgadi d’alp.

Patric Albrecht è signun sin l’alp Stavonas sur Sursaissa. Ses di da lavur cumenza marvegl enturn las 04:30 uras. El cumenza a chaschar fin che ses gidanters mulschan las 60 vatgas e laschan ir ellas sin pastira. L’entschatta da la stagiun vevan els anc da mulscher passa 100 vatgas.

Grondas midadas

Sper il chaschar è il tegnai schuber la chascharia sco era il tschaler da chaschiel ina gronda incumbensa dal signun. Patric Albrecht di che las leschas e las prescripziuns vegnian adina pli strictas. Uschia na saja la lavur dad oz en chascharia betg da cumparegliar cun quella d‘avant 15 onns cura ch’el haja fatg sia emprima stagiun sco signun. La fascinaziun per la lavur sco era la vita si d’alp saja dentant la medema. Ed era unfis da far chaschiel n’è Patric Albrecht anc betg suenter radund 80 dis si d’Alp.

Alp Stavonas en cifras

Vatgas da latg104
Animals total (vatgas da
latg, vatgas-mamma, vadels, portgs)
ca. 200
Liters latg per stagiunca. 90‘000
Chaschiel per stagiunca. 8,7 tonnas
Paintg per stagiunca. 1 tonna

Bilantscha positiva

Patric Albrecht è fitg cuntent cun la stagiun d’alp 2016. Il muvel saja stà sauns, il team d’alp haja funcziunà bain ensemen ed era da l’aura n’astgi el betg sa lamentar. Uschia èn il signun sco era ils purs cuntents cun il latg ed il chaschiel d’alp da quest onn. Ina part dal chaschiel saja gia vendida u ida als purs. L’autra part madiria anc en il tschaler da chaschiel sin l’alp Stavonas. Quellas magnuccas vegnan lura prendias giuadora cun la fin da la stagiun tranter ils 10 ed ils 12 da settember.

RR actualitad 06:00+

Artitgels legids il pli savens