Siglir tar il cuntegn

Surselva Rueun: Giagliner per 2'000 giaglinas è reconstruì

L'avust passà è la stalla cun 2'000 giaglinas dal pur Markus Alpiger arsa. Uss è la stalla reconstruida e dapi la fin da december ha il pur puspè giaglinas.

La veranda d'enviern da la nova stalla. Avant l'incendi sa chattavan qua las maschinas agriculas.
Legenda: La veranda d'enviern da la nova stalla. Avant l'incendi sa chattavan qua las maschinas agriculas. RTR, C. Albin

Avant circa in mez onn, la notg da dumengia sin glindesdi ils 14 d'avust, è la stalla da giaglinas dal pur da bio Markus Alpiger arsa cumplettamain. Tut ils circa 2'000 animals èn ars en las flommas ed era la butia cun products dal bain puril e bunamain tut las maschinas agriculas che sa chattavan en la stalla èn vegnidas destruidas. Per il pur da Rueun èsi dentant spert stà cler ch'el vegnia puspè a bajegiar si la stalla.

Nova stalla en temp da record

Strusch sis mais suenter il brischament, pli exact ils 22 da december, ha el gia puspè pudì laschar ir las emprimas giaglinas en la nova stalla. Quai saja stà pussaivel perquai ch'ils fundaments dal bajetg na sajan betg vegnids donnegiads e n'hajan betg stuì vegnir reconstruids.

Cun bajegiar la nova stalla ha Markus Alpiger era gist anc fatg insaquantas midadas. Uschia consista il nov bajetg da dapli metal e pli pauc lain, quai che porta avantatgs pertutgant l'igiena. La halla nua che las giaglinas pon ir en il liber l'enviern ed il giagliner sez sa chattan uss pli u main sin il medem nivel. Persuenter èn las maschinas agriculas uss parcadas en il plaun sut da la stalla.

RR actualitad 17:00