Siglir tar il cuntegn

Header

Navigaziun

cuntegn

Rundella a Laax Nuf, u betg nuf en la rundella – quai decida il Tribunal federal

la rundella.
Legenda: La rundella che vegn tema a Losanna – la rundella «Marcau» a Laax va fin a Losanna. RTR, Linus Livers

La Dretgira administrativa dal Grischun ha refusà il recurs da la vischnanca da Laax. Lezza ha vulì recurrer cunter l'Uffizi da construcziun bassa chantunal che na vul betg laschar decorar la rundella «Marcau».

Uss ha il Tribunal federal da decider, sche Laax dastga installar ina sculptura en furma da nuf cun inscripziuns sin sia rundella. Quai scrivan las gasettas da la Somedia.

Tenor il chantun memia privlus

Tenor la decisiun publitgada ils ultims dis, argumentescha il chantun che las inscripziuns previsas distirian memia fitg l'attenziun d'automobilists davent da la via – pia pericliteschia la segirtad dal traffic.

Sin las 4 cordas dal nuf èsi previs d'inscriver las direcziun en las parts da Laax: Cons, Murschetg, Salums e vitg. Questas inscripziuns na sajan betg legiblas e da chapir spert avunda. La sculptura senza inscripziuns na saja percunter nagin problem.

Tenor la vischnanca nagina reclama

La vischnanca da Laax fa valair che la basa legala na saja betg gista. Ins na possia betg giuditgar sin basa da la lescha per il traffic sin via che scumonda furmas da reclama ed auters avis en scrittira, purtret e tun. Quai na saja betg reclama. E privlusa na fissi la situaziun era betg, argumentescha Laax.

Tenor la dretgira betg legibel bain avunda

La Dretgira administrativa è suandada l'argumentaziun dal chantun. I sa tracti d'in avis sper via tenor lescha da traffic. E cun la scrittira en trais dimensiuns che saja legibla malamain pudessi questa periclitar la segirtad.

Sco davosa instanza ha uss il Tribunal federal a Losanna da giuditgar.

RR novitads, 08:00