Siglir tar il cuntegn

Header

cuntegn

Surselva Sagogn: In project d’agroturissem en la Ruinaulta

Gist visavi la staziun da Valendau-Sagogn duain vegnir construids dus lajets da pestgar. Ir cun canu u far ina spassegiada tras la Ruinaulta, quai è atgnamain tut quai ch'ins po far en quella regiun ch'è sut protecziun naziunala. Uss datti qua però in preproject per agroturissem a Bargaus /Sagogn.

Quai è en la vischinanza da la staziun da viafier da Valendau-Sagogn. La Selva SA, cun sedia a Laax ed en possess da la famiglia Gschwend, vul realisar dus lais da pestgar e culturas da verduras en quella regiun.

audio
Bunura: Idea per lais da pestgar a Sagogn
ord Actualitad dals 04.08.2017.
laschar ir. Durada: 3 minutas 2 Secundas.

Il project è ponderà uschia che la Selva SA porscha, sper ils lais cun ils peschs, era gist la pussaivladad da cuschinar e mangiar ils peschs en il lieu. Per quai intent vegn bajegià enturn ina stalla existenta en in manaschi da gastronomia cun ina terrassa per var 50 persunas.

Sper ils peschs vegnan era las verduras cultivadas en quai plaz a Bargaus e pon vegnir consumadas là. Il pesch ed il tartuffel frestg dal lieu, quai è tenor il manader da la Selva SA, Philipp Gschwend, la filosofia.

Preproject sin maisa

L'emprim pass ha Philipp Gschwend fatg cun preschentar quella idea a la populaziun da Sagogn. Gia involvids en il project èn il chantun e las uniuns per la protecziun d'ambient. Sco quai che Renata Fulcri da la Pro natura ha detg ad RTR, hajan els enconuschientscha da quai project. Da lur vart na dettia però anc nagin giudicament.

Ils da Sagogn èn ils emprims ch'han da decider en chaussa. Per pudair realisar quai project sto Bargaus vegnir midà en ina zona per agroturissem. Ils da Sagogn decidan ques atun en chaussa.

RR actualitad 08:00

Artitgels legids il pli savens