Avant 3 onns ha la vischnanca da Sagogn stuì prender ina mesira en connex cun in passadi per il traffic plaun. Per motivs da responsabladad e segirezza ha ella serrà la punt sur l'aual da la Val Mulin. Igl è in passadi impurtant per il traffic dal temp liber. Finalmain è ina nova punt en vista, il project è semtgà.
Il rapport dals geologs na fetschia betg pauca speranza, aveva la presidenta communala da Sagogn, Katrin Blumberg, respundì la stad 2024 a la dumonda da la FMR. Quant ditg che la punt sur l'aual da la Val Mulin restia anc serrada, e sch'i saja en vista ina soluziun, aveva il redactur vulì savair. Entaifer las rutas e sendas da la Ruinaulta e da l'Uaul Grond è quella colliaziun d'impurtanza. Fitg blers bikers e viandonts che sa movan en lur temp liber en la regiun traversan la Val Mulin. Igl è ina chavorgia spuretga che s'extenda davent da la chaplutta da Sontga Clau vers sid. En il fund è l'ual che sbucca en il Rain sin l'autezza da la staziun Valendau-Sagogn.
La chavorgia cun la pli gronda erosiun
Viandonts che arrivan cun il tren emprendevan d'enconuscher quella chavorgia laterala da la Ruinaulta. L'onn 2001 aveva l'Uniun da traffic Sagogn laschà montar sur l'aual ina punt. Lezza giada han ins remplazzà la simpla punt da lain da 20 onns che l'erosiun aveva medemamain destabilisà. L'onn 2022, puspè 20 onns pli tard, ha l'erosiun mess ord funcziun l'object da 3,8 tonnas e 25 meters lunghezza. In urizi vehement cun crappa e bler'aua aveva lavà ora las spundas cun il fundament dal stabiliment.
En circuls da la geologia èsi enconuschent che la Val Mulin è la chavorgia en las Alps cun la pli gronda erosiun. Il material luc da la val lavura cuntinuadamain d'omaduas varts. Dapi che las vischnancas da Laax e Sagogn han dà a l'Ovra electrica da Flem la concessiun per in'ovra electrica è il letg da l'aual dal reminent sa sbassà per passa 10 meters.
La planisaziun po cuntinuar
I saja nunpussaivel da avrir puspè quella punt, aveva la presidenta communala infurmà a la radunanza communala. La punt-fier tegniss anc ditg – mo las spundas da l'imposanta Val Mulin sa smulan e sa movan senza fin. Ussa, 3 onns suenter ch'ins ha stuì serrar il passadi, è ina soluziun en vista. Ils 7 da november 2025 ha la vischnanca politica publitgà la dumonda da construcziun. Ils 27 da november finescha il temp da recurs e previsiblamain va il project en la proxima fasa: La planisaziun po cuntinuar. Quai ha Daniel Tuggener, il responsabel da la suprastanza communala, confermà a la FMR.
Ussa vegnin nus a lavurar vid ils detagls.
Ultra conceda el ch'in dals puncts saja da garantir las finanzas. Per quest intent vul la suprastanza organisar in'acziun aposta per quest project, anc ussa saja dentant memia baud da explitgar detagls da quella.
Ina punt nova sin il november 2026
In passadi en quest lieu datti dal reminent dapi passa 1'500 onns. Tenor l'istoricher Martin Bundi (1932-2020) è quel stà decisiv per la colonisaziun da la Foppa e da la regiun. La via da transit medievala da la vart sanestra dal Rain manava da Trin tras l'Uaul Grond, giu en la Val Mulin e da tschella vart ensi a Sagogn e la Foppa. L'onn 2001 ha l'Uniun da traffic Sagogn laschà montar la punt-fier existenta cun agid d'in helicopter. Per fixar la construcziun da fier han ins construì lezza giada – per l'emprima giada en la istorgia da quest passadi – sochels da betun. La Cuminanza grischuna per sendas aveva sustegnì il project. Sco quai che Daniel Tuggener di, sustegnan il maun public e singulas instituziuns il project da la punt nova.
Il mars 2026 vegn, previsiblamain, la radunanza communala da Sagogn a tractar la dumonda da credit. Sco quai che Daniel Tuggener di, n'è la summa anc betg definitiva, il gerà responsabel quinta cun approximativamain 300'000 francs. Tenor il plan da termins, e sche la radunanza communala approvescha il credit, po la vischnanca surdar las lavurs fin la fin da mars. Gia il matg 2026 duain las interpresas a savair entschaiver a construir ils cunterforts uschia che la punt duai esser semtgada il november 2026.
Lieu alternativ è nunpussaivel
Ina dumonda resta: Tegn l'object puspè mo circa 20-25 onns? N'è quel betg exponì puspè memia fitg a l'erosiun? Ina resposta dat il rapport tecnic ch'è stà publitgà cun la dumonda da construcziun. L'object nov duai vegnir construì sco classica punt da sugas, e quai en il medem lieu. Chattar in lieu alternativ è nunpussaivel. La Val Mulin fa part dal status da protecziun da la Ruinaulta ch'è in monument da la natira da muntada naziunala. Uschia datti ina suletta opziun per la punt da remplazzament: «Pervia da l'erosiun ston ins stender ella pli lunsch vers las spundas, uschia ch'ella vegn ad esser 30 meters lunga», pon ins leger en il rapport tecnic. Quel sa basa sin expertisas dals geologs.