Mustér vul vinavant sia patinera. Las votantas ed ils votants han acceptà l'iniziativa che pretenda da mantegnair il glatsch artifizial al Center Fontauna. La decisiun è crudada cun 384 Gea encunter 298 vuschs Na – pia cun 56%.
Il president communal René Epp è sa mussà cuntent dal resultat. Ins haja sapientivamain festinà cun la fatschenta, per pudair cumenzar cun las lavurs uschè spert sco pussaivel. La finamira saja d'avrir la patinera gia la proxima stagiun.
La suprastanza vuleva...
Clemens Berther ch'è en la suprastanza communala da Mustér e presidiescha la cumissiun da manaschi dal Center Fontauna ha preschentà al parlament la proposta da sanar la patinera. Il cussegl da vischnanca da Mustér ha dentant refusà il credit da 1,1 milliuns francs per la sanaziun da la patinera.
Il suprastant è stà trumpà ch'il credit è vegnì refusà, perquai ch'i dat il glatsch artifizial gia dapi passa 30 onns.
Nus n'avain uss davent da Flem fin a Tschamut nagina patinera artifiziala. Quai è fitg donn.
Trumpà na saja el betg mo da la decisiun sco tala, mabain era da l'agir dal cussegl da vischnanca. El avess giavischà ch'il parlament laschia decider il pievel.
... il parlament betg
Theres Burri Gadola, presidenta dal parlament, era da l'avis ch'il parlament haja la legitimaziun e l'obligaziun da decider. La finala hajan plirs facturs chaschunà il Na. Quai sajan per exempel ils auts custs da mantegnair il glatsch u era ch'auters gronds projects èn actualmain pendents a Mustér.
Ina maioritad dal cussegl è stada da l'avis da metter da la vart ils daners per la scola. I va per priorisar projects.
La suprastanza communala vuleva plinavant cuvrir ils custs per la sanaziun da 1,1 milliuns francs cun ina part dal gudogn da l'onn 2025. La maioritad dal parlament ha dentant priorisà auters projects. Il gudogn duai vegnir duvrà per la renovaziun dal bajetg da scola che spetga.
280 suttascripziuns per la patinera
La decisiun dal parlament n'han dentant betg tuts acceptà. In comité è sa furmà ed ha lantschà in'iniziativa per salvar il glatsch da Mustér. Il comité ha rimnà totalmain 280 vuschs valaivlas. Quai ha era confermà René Epp, president da la vischnanca da Mustér. Tenor la constituziun communala fissan stadas necessarias 150 suttascripziuns per che la decisiun vegnia davant il pievel.
Il glatsch da Mustér para da polarisar. U, sco Bruno Flepp ha ditg: «Quai muventa ed occupa la glieud. Quai n'è betg nagut.» Er a René Epp, president da vischnanca, ha quest resultat fatg impressiun.
280 suttascripziuns è fitg bler e quai en uschè in curt temp. E quai munta che quai sto esser stà in schoc per la populaziun. Uschiglio na fiss quai betg reussì.
L'entschatta matg aveva il parlament communal anc refusà il credit per sanar quest glatsch cun in resultat stretg. Bruno Flepp vuleva dentant ch'ils e las da Mustér possian decider sezs co vinavant cun lur glatsch.
Mo per il curling na ston ins betg mantegnair il glatsch. Dentant per famiglias, per noss indigens ed era per giasts è quai ina purschida che vala la paina da mantegnair.
En il cas dal glatsch da Mustér munta quai d'investir 1,1 milliuns francs per la sanaziun. Ina summa ch'è tenor il messadi da la suprastanza supportabla, uschia ha ditg René Epp. Perquai ha la suprastanza recumandà al parlament communal d'approvar l'iniziativa.
L'iniziativa na mida betg la posiziun dal parlament
Ils 17 da zercladur 2026 ha il parlament communal da Mustér tractà l'iniziativa. El é restà tar sia posiziun. Il glatsch stettia a disposiziun memia curt temp ed ina segunda raschun sajan ils custs da manaschi. Il parlament ha proponì da refusar l'iniziativa ed ha era desistì da far ina cuntraproposta.