Mustér vul vinavant sia patinera. Las votantas ed ils votants han acceptà l'iniziativa che pretenda da mantegnair il glatsch artifizial al Center Fontauna. La decisiun è crudada cun 384 gea encunter 298 vuschs na – pia cun 56% gea. Il president communal René Epp è sa mussà cuntent dal resultat. Ins haja sapientivamain festinà cun la fatschenta, per pudair cumenzar cun las lavurs uschè spert sco pussaivel. La finamira saja d'avrir la patinera gia la proxima stagiun.
Ils 17 da zercladur 2026 aveva il parlament communal da Mustér tractà l'iniziativa - e refusà da sanar la patinera per 1,1 milliuns francs. Il glatsch stettia a disposiziun memia curt temp ed ina segunda raschun sajan ils custs da manaschi. Il parlament ha proponì da refusar l'iniziativa ch'era vegnida inoltrada cun 280 suttascripziuns. Necessari fissan stadas 150 suttascripziuns. La suprastanza communala aveva anc recumandà al cussegl da vischnanca d'approvar l'iniziativa. Quel era però restà tar ses NA a la sanaziun da la plazza da glatsch artifizial ed è desistì da far ina cuntraproposta.
Qua l'entira istorgia
A Mustér datti pia vinavant in glatsch artifizial sco fin qua sper il Center Fontauna. Quai cunter la veglia dal cussegl da vischnanca da Mustér che aveva refusà in credit da 1,1 milliuns francs per la sanaziun da la patinera. Quai aveva chaschunà reacziuns - d'ina vart la chapientscha per la decisiun - da l'autra vart deplorar che la purschida d'enviern, sper las pistas, sparescha.
La suprastanza vul...
Clemens Berther ch'è en la suprastanza communala da Mustér e presidiescha la cumissiun da manaschi dal Center Fontauna ha preschentà al parlament la proposta da sanar la patinera. Il suprastant è stà trumpà ch'il credit è vegnì refusà, perquai ch'i dat il glatsch artifizial gia dapi passa 30 onns.
Nus n'avain uss davent da Flem fin a Tschamut nagina patinera artifiziala. Quai è fitg donn.
Trumpà na saja el betg mo da la decisiun sco tala, mabain er da l'agir dal cussegl da vischnanca. El avess giavischà ch'il parlament laschia decider il pievel.
... il parlament betg
Theres Burri Gadola, presidenta dal parlament, è da l'avis ch'il parlament haja la legitimaziun e l'obligaziun da decider. La finala hajan plirs facturs chaschunà il Na. Quai sajan per exempel ils auts custs da mantegnair il glatsch u era ch'auters gronds projects èn actualmain pendents a Mustér.
Ina maioritad dal cussegl è stada da l'avis da metter da la vart ils daners per la scola. I va per priorisar projects.
La suprastanza communala vuleva plinavant cuvrir ils custs per la sanaziun da 1,1 milliuns francs cun ina part dal gudogn da l'onn 2025. La maioritad dal parlament ha dentant priorisà pli fitg auters projects. Il gudogn duai vegnir duvrà per la renovaziun dal bajetg da scola che spetga.
280 suttascripziuns èn rimnadas: ils iniziants èn cuntents
Bruno Flepp, iniziant dal comité che vul salvar il glatsch da Mustér, è fitg cuntent. Da las 282 vuschs ch'el ha pudì rimnar – ensemen cun auters iniziants ed iniziantas – èn totalmain 280 vuschs valaivlas. Quai conferma era René Epp, president da la vischnanca da Mustér. Tenor la constituziun communala fissan stadas necessarias «mo» 150 suttascripziuns per che la decisiun vegnia avant il pievel.
Il glatsch da Mustér – quel para da polarisar. U, sco Bruno Flepp di: «Quai muventa ed occupa la glieud. Quai n'è betg nagut.» Er a René Epp, president da vischnanca, fa quest resultat impressiun.
280 suttascripziuns è fitg bler e quai en uschè in curt temp. E quai munta che quai sto esser stà in schoc per la populaziun. Uschiglio na fiss quai betg reussì.
L'entschatta matg aveva il parlament communal anc refusà il credit per sanar quest glatsch cun in stretg resultat. Bruno Flepp vuleva dentant ch'ils e las da Mustér possian decider sezs co vinavant cun lur glatsch.
Mo per il curling na ston ins betg mantegnair il glatsch. Dentant per famiglias, per noss indigens ed era per giasts è quai ina purschida che vala la paina da mantegnair.
En il cas dal glatsch da Mustér munta quai d'investir 1,1 milliuns francs per la sanaziun. Ina summa ch'è tenor il messadi da la suprastanza supportabla, uschia ha ditg René Epp, president da vischnanca. Perquai recumonda la suprastanza al parlament communal d'approvar l'iniziativa.