Siglir tar il cuntegn

Header

cuntegn

Sanadad Surselva Lavurar ensemen per mantegnair il provediment da sanadad

Dapi plirs onns emprova la SanaSurselva dad unifitgar sut in tetg las purschidas da sanadad en Surselva. Suenter pliras fasas dal project «reit da sanadad» èn las instituziuns s’exprimidas ed ellas han numnà ils giavischs, di la presidenta Martina Beeli.

Quels èn surtut da collavurar en l’avegnir en pliras spartas, per exempel en l’IT. Gest la digitalisaziun fa per part quitads a las instituziuns. Cun collavurar pudessan ins per exempel avair in spezialist ch'è occupà tar tut las instituziuns, quai vul dir tar las trais instituziuns da Spitex e las otg chasas d’attempads en Surselva, di Martina Beeli.

audio
Provediment da sanadad en la Surselva
ord Actualitad dals 08.12.2022. Maletg: Keystone
laschar ir. Durada: 3 minutas 38 Secundas.

In ulteriur punct nua ch’ins pudess collavurar è in pool da persunal. Quai pussibilitass per exempel da vesair nua ch'ins ha persunal e nua ch'i manca persunas. Dentant na veglia quai betg dir ch’ina persuna che lavura a Mustér ha dad ir a lavurar a Vella. Ella vesi dentant era la schanza da per exempel ir a lavurar per in temp en l’ospital, ed uschia vesair co tut funcziuna e profitar da las experientschas vicendaivlas.

Ospital regiunal a Glion sco impurtanta pitga

L’ospital regiunal a Glion na vegnia betg mess en dumonda, di tant Martina Beeli sco era la directura da l'ospital Claudia Käch. Il chantun ha mussà ch’el veglia ina purschida medicinala decentrala. Ed era la situaziun geografica en il chantun saja uschia che senza questas purschidas decentralas na funcziunass il sistem medicinal betg, di Claudia Käch.

audio
Situaziun da l'ospital regiunal Surselva
ord Actualitad dals 08.12.2022. Maletg: RTR
laschar ir. Durada: 2 minutas 53 Secundas.

Dentant è surtut la finanziaziun da las purschidas dals ospitals da reponderar. Ils ospitals èn tuts sut-finanziads. Pli e pli blers cas vegnan tractads a moda ambulanta, quai che fetschia senn, ma la finanziaziun sto vegnir reponderada. Quai na po betg esser ch’els fetschian cun mintga tractament in deficit. Qua saja la politica dumandada, di la directura che va en pensiun anticipadamain.

Per ella è il sectur da sanadad ina branscha fitg attractiva, ma tuts stoppian ponderar da megliurar la situaziun. Uschia dovra quai persunal scolà e quai surtut era spezialisà, ed alura dovra quai la collavuraziun sur tut ils secturs.

RTR actualitad 07:00

Artitgels legids il pli savens

Scrollar a sanestra Scrollar a dretga