Atgnamain eri planisà ch’ils students dal gimnasi da la claustra da Mustér possian dapi il cumenzament da l’onn da scola puspè far gimnastica en l’atgna halla. Ma la sanaziun ha pir ussa cumenzà. Tenor Bruno Hensler, il rectur dal gimnasi, ha quai duas raschuns. Per l’ina hajan ins gì pli ditg da sclerir e planisar ils detagls e da l’autra vart haja quai dà midadas da persunal en claustra sin il sectur da construcziun, uschia saja tut sa stuschà.
Custs pli auts
Cun la planisaziun en il detagl han ins era vis ch’ils var 600’000 francs calculads avant in onn en memia pauc per pudair far la sanaziun. Quai saja stà ina calculaziun approximativa sin basa dal dumber da cubics. La sanaziun vegn ussa calculada cun 1,1 milliuns francs. Tar la planisaziun hajan ins lura vis ch’i dovria sper la sanaziun da la halla sco tala era anc in segunda extrada d’urgenza. Quai dovri per pudair sa radunar cun tut ils scolars en halla ubain per organisar occurrenzas externas, declera Bruno Hensler. L’extrada d’urgenza vegn lura era gist duvrada sco entrada per la halla e per l’aula ch’è sur la halla da gimnastica. Questa entrada saja meglra che l’entrada existenta via ina rampa taissa.
Scolars e collavuraturs sa gidan
Finanziada vegn la sanaziun cun daners ch’il chantun metta a disposiziun per l’infrastructura da las scolas medias e donaziuns. Ma era ils collavuraturs ed ils scolars sa gidan. Sco Bruno Hensler di haja la claustra laschà far 1400 buttiglias da baiver cun inscripziuns sco «Aua inspironta» u «Gust da semuentar» che vegnan vendidas a favur da la sanaziun. Var 400 buttiglias sajan gia vegnidas vendidas. La vendita da las buttiglias cuntinueschia vinavant.