Las fatschadas dal Center da sport e cultura (CSC) han urgentamain basegn d’ina sanaziun. Sco quai ch’igl è vegnì constatà la fin da l’onn 2015, entra aua en ils mirs, quai che chaschuna en ils tschalers da la protecziun civila per bulieus. Damai ch’ils tschalers vegnan duvrai per dar suttetg a champs che procuran al CSC entradas annualas da 170’000 francs, èsi tenor la suprastanza communala indispensabel da far immediatamain ina sanaziun da la fatschada nord e vest da la halla da gimnastica. Il cussegl da vischnanca ha dà suatientscha e lubì persuenter il credit da 280’000 francs.
Sutgas e maisas
Sper il credit per la sanaziun urgenta ha il cussegl da vischnanca era anc approvà in credit per remplazzar las maisas e las sutgas dal CSC. Questas mobiglias èn numnadamain passa 35 onns veglias ed han gia surpassà ils megliers temps. Per las 900 sutgas e 150 maisas è vegnì lubì in credit da 196’000 francs.
Remplazzament da l’illuminaziun
480’000 francs ha il cussegl da vischnanca decidì per remplazzar l’illuminaziun dal vitg. L’illuminaziun saja vegnida in pau en ils onns ed i na saja savens betg pli pussaivel da far reparaturas. Cun la nova illuminaziun da LED possian ins era spargnar energia.
Approvà quint
Il cussegl da vischnanca ha era approvà il quint 2015. Quel serra cun in gudogn da 273'350.40 francs. Quai tar entradas da 18'185’430.38 francs ed expensas da 17‘912‘079.98 francs. Il cashflow è tar 2'169’471 francs. Las amortisaziuns muntan a 2'407'043 francs. Il bun quint saja d’attribuir a la buna disciplina da budget, entras dapli entradas da taglia ed ils tschains d’aua e la vendita d’energia da concessiun.