Gia per la segunda giada èn las portas avertas en l’anteriura fabrica da ponn a Trun. Ina da las attracziuns principalas èn las novas localitads da la Scala Trun, in lieu da cultura ed d'inscunter, inizià da Quirina Lechmann e Gianin Conrad. Els han envidà Fis Guldimann, Evelina Cajacob, Lucia Degonda, Luc Isenschmid ed Andrea Todisco d’exponer lur ovras. Dasper hai dà in program da musica e discussiuns en las localitads da l’anteriura fabrica.
Ils organisaturs eran cuntents che bleras persunas interessadas han chattà la via a Trun. Era perquai che scolaras e scolars da la scola d’art dal Principadi dal Lichtenstein han pudì exponer là per l’emprima giada lur ovras.
La fabrica è ina scrinaria, ina stampa e bler auter
Gia dapi in pèr onns èn Eugen Demont e Manuel Maissen sa chasads en ils anteriurs biros da la fabrica. Per Eugen Demont ha la fabrica da ponn ina gronda impurtanza. Uschia saja stada ina da las ideas, da restaurar las localitads sco da pli baud. Pliras unifurmas veglias èn vegnidas chattadas ed exponidas – e collian uschia il vegl cun il nov.
Eugen Demont è era activ en il squitsch da textilias. El haja en il senn da porscher qualitad da vestgadira sco antruras – e cun si il tschut da Trun. Ma surtut saja impurtant che la fabrica vegnia duvrada e na vegnia betg surlaschada a la decadenza, uschia Eugen Demont. Ultra da quai saja l’intenziun d’avrir almain ina giada ad onn las localitads e far ina pitschna festa da scuntrada. Quai spera el da pudair cuntinuar era l’auter onn e sche pussaivel cun daplirs purschiders.