Las raschuns sajan il ferm franc svizzer e la luna da las consumentas e dals consuments retegnida. E cunzunt en l'Europa sajan las cundiziuns per interpresas sa pegiuradas. Auts custs d'energia, pli auts tschains ed ina pli auta inflaziun sminueschian la capacitad da cumpra. Er l'economia d'autos mussia segns da flaivlezza. Quai scriva l'Ems Chemie en ses rapport trimestrial.
La producenta da chemicalias veglia vinavant persequitar sia strategia da render accessibel novas fieras cun spezialitads. Ella vul augmentar la vendita ed il svilup da products per rinforzar novas fatschentas. Cunzunt products che spargnian energia e custs sajan stimads tar la clientella.
En l'emprim semester aveva l'Ems Chemie gia fatg 7,9% main svieuta e main gudogn. L'onn 2022 aveva l'interpresa da Domat anc fatg ina svieuta da record cun radund 2,2 milliardas francs.
