La vischnanca da Laax planisescha da midar il project d'engrondir la chasa da scola. Uschia ha il president communal Franz Gschwend infurmà la populaziun a la radunanza da budget da quest'emna. Da nov vegnian ils dus cubus da lain planisads tschintg meters pli bas che previs ordiundamain. Motiv per adattar il project èn recurs da vischins. Ils possessurs da segundas abitaziuns hajan recurì cun l'argument ch'il bajetg prendia ad els la vista. Planisads eran dus cubus da lain sin la halla da parcar gist sper la chasa da scola existenta.
L'avrigl 2019 aveva la radunanza communala da Laax dà glisch verda d'engrondir il bajetg da scola. En discurs cun ils vischins spera il president communal ch'i dettia ina soluziun. Tenor planisaziun dal temp duessan ils novs implants da scola èsser pronts sin l'onn da scola 2022/2023.