Siglir tar il cuntegn

Header

video
Brischament Schluein
Or da RTR Social dals 09.09.2021.
laschar ir
cuntegn

Schluein En la zona d'industria ha brischà ina halla

La Polizia chantunala ha confermà sin dumonda da RTR ch'igl ha brischà a Schluein en la zona d'industria «Isla». Ils pumpiers e la polizia sajan stads al lieu, uschia il pledader Roman Rüegg. Il fim saja stà da vesair lunsch enturn sur Schluein.

Brischà ha gievgia mezdi ina halla da Stradun SA, construida da metal cun mantè da lain. Travs sajan luadas ed il tetg è dà ensemen. Il fieu saja sut controlla, ils pumpiers eran anc in temp vid stizzar. Il motiv saja stà che differents liquids per la construziun da via eran deponids en questa halla. Quels possian arder anc pli ditg suenter in fieu.

audio
Incendi en zona d'industria a Schluein
01:37 min, Actualitad dals 09.09.2021.
laschar ir. Durada: 01:37 minutas.

Da pliras maschinas saja be pli da vesair il skelet. Tut en tut haja l'incendi chaschunà in donn da radund in milliun francs, sco la Polizia chantunala scriva. Persunas na sajan betg vegnidas blessadas, nagin era dal temp da l'incendi al lieu.

En acziun eran radund 90 persunas dals pumpiers da Laax/Falera/Sagogn/Schluein, Glion e Flem. Per segirar l'acziun era il salvament da l'ospital Glion al lieu. Ultra da quai eran era ils pumpiers da l'Ems Chemia en acziun, quai perquai ch'igl haja en talas hallas er adina materials betg dal tut enconuschents e ch'i valia da far ina stimaziun dal privel tar quels materials. La Polizia chantunala examinescha uss la raschun per l'incendi.

Suenter l'acziun hai anc dà ina pitschna acziun da solidaritad. A tut las forzas d'intervenziun han vendidras da la Landi, che sa chatta gist dasperas, repartì butteglias da baiver.

audio
Per tadlar curt e cumpact
02:14 min, RTR Audio dals 09.09.2021.
laschar ir. Durada: 02:14 minutas.

RTR novitads 14:00

Artitgels legids il pli savens

Scrollar a sanestra Scrollar a dretga