Siglir tar il cuntegn

Header

cuntegn

Surselva Schuschuris cun las purschidas per la carta da giasts

La carta da giasts da Sedrun Mustér Turissem ha puspè procurà per discussiuns. Novas purschidas vegnan inclusas en la carta da giasts e curt suenter puspè annulladas.

Per ils giasts da vacanzas da Mustér e Tujetsch datti bunas novas. La carta da giasts survegn dapli valur. Sper pudair ir gratuitamain cun il tren da Mustér fin sin il Pass da l’Alpsu e far diever da la pendiculara da Mustér èn ussa era la pendiculara sin il Tgom ed il Bogn Sedrun inclusas en las purschidas gratuitas da la carta da giasts.

Dapli daners che quintà e la garanzia da la vischnanca

audio
Augment da la purschida per la carta da giasts da Sedrun Mustér Turissem
ord Actualitad dals 11.06.2015.
laschar ir. Durada: 2 minutas 8 Secundas.

Che questas duas purschidas pon ussa tuttenina vegnir inclusas en la carta da giasts ha ina simpla raschun, declera il president da vischnanca da Tujetsch, Beat Roeschlin. La vischnanca da Tujetsch haja ussa pudì fatg calculaziuns pli exactas quants daners che vegnan incassai cun las taxas da la nova lescha da turissem, uschia ch’i dettia avunda daners per includer questas duas purschidas. Per il cas ch’i na dess tuttina betg avunda daners ord las taxas da turissem, surpiglia la vischnanca sezza ils custs ha ditg Roeschlin vinavant.

Ulteriura purschida è gia puspè vegnida stritgada

Era il Center da sport e cultura a Mustér, era vegnì inclus en la carta da giasts. Quai ha fatg plaschair a Roger Tuor ch’è manader da la cumissiun da manaschi dal center da sport e cultura. En sia funcziun sco vicepresident communal da la vischnanca da Mustér è el dentant surstà che la suprastanza communala n’è betg vegnida orientada avant che Sedrun Mustér Turissem ha derasà l’infurmaziun a tuts pertutgads. Quai cunzunt perquai ch’il president communal, Francestg Cajacob, è era il represchentant da la vischnanca en la suprastanza da Sedrun Mustér Turissem.

Incap da communicaziun

audio
Problems da communicaziun pertutgan la purschida dal Center da sport e cultura
ord Actualitad dals 11.06.2015.
laschar ir. Durada: 2 minutas 40 Secundas.

Francestg Cajacob discurra d’ina malchapientscha. El haja quintà ch’i tanschia sche l’inclusiun dal Center da Sport e cultura vegnia decidida da Sedrun Mustér Turissem. Suenter ch’igl è stà enconuschent a la suprastanza da Sedrun Mustér Turissem che la vischnanca da Mustér n’ha betg discutà en suprastanza communala da surpigliar ils custs da 35’000 francs per includer questa purschida, per il cas che las taxas da turissem na tanschan betg per cuvrir quels custs, ha quai procurà per malsegirtad. Singulas persunas da la suprastanza da Sedrun Mustér Turissem levian ina garanzia da la vischnanca da Mustér avant ch’includer la purschida, ha Francestg Cajacob ditg. Perquai saja la purschida puspè vegnida stritgada da la carta da giasts.

Betg giud maisa

Sco Francestg Cajacob ha dentant ditg, vegnia quest tema anc ina giada discutà e quai tant en la suprastanza da Sedrun Mustér Turissem sco era en suprastanza communala. Lura vegn decidì sche las purschidas dal Center da sport e cultura a Mustér fan part da la carta da giasts da Sedrun Mustér Turissem.

Artitgels legids il pli savens