Las duas vischnancas da Sursaissa e Mundaun vulan fusiunar. Sco emprim pass en quella direcziun han ellas decidì il december passà, da manar davent da la stad 2015 ina scola communabla bilingua. La vischnanca da Sursaissa ha gì l'incumbensa, da scriver il concept, co quella scola pudess esser organisada. Uss vegn il concept preschentà a las duas radunanzas communalas, che han gist da votar en chaussa.
Previs è la scoletta a Flond e la scola primara a Meierhof. Las classas primaras rumantschas vegnan manadas parallel cun las classas tudestgas. Sche pussaivel duessan era las lecziuns da roms laterals, nua che las duas classas rumantschas e tudestgas vegnan instruidas ensemen (p.ex. musica ni gimnastica), vegnir tegnidas en rumantsch. Tar il persunal da la scola na vegn betg quintà cun relaschadas. Sche las duas vischnancas acceptan il concept ed era il chantun dat ses consentiment, san vegnir elavurads ils detagls dal concept, sco per exempel l'urari definitiv.