Il nov parc per uffants da la scola da skis Mundaun duai vegnir bajegià a Cuolm Sura, sin la planira tranter il runal Cuolm Sura-Plitschès e la sutgera Cuolm Sura-Péz Mundaun. Il parc actual a Valata, sper la staziun da las pendicularas Mundaun, vegniss serrà.
Tenor il scolast da skis e maina project Joël Brunold, è il parc a Valata plitost sumbrivaun e la topografia n’è betg ideala. Plinavant passa ina pista da skis tras il parc, quai che po manar a situaziuns privlusas, sch’ils skiunz na fan betg attenziun. Il nov lieu a Cuolm Sura saja perencunter in lieu ideal per ina scola da skis. Ina gronda planira cun da la vart plauncas da differentas pendenzas porschian tut quai ch’i dovria per crear in parc modern ed attractiv.
Tschintas da transport, runals ed in carussel
El nov parc èn planisads duas tschintas da transport, dus runals per uffants ed in carussel. Ils custs d'investiziun totals muntan a circa CHF 185'000.-. La scola da skis sezza surpiglia CHF 130'000.-, il rest da CHF 55'000.- duai vegnir finanzià entras sponsurs. Tenor Joël Brunold sajan els sin buna via da chattar avunda sponsurs. Perquai è el persvas, ch’il nov parc possia gia vegnir realisà sin la proxima stagiun d’enviern 2016/17. Ils custs da mantegniment dal parc muntan a circa CHF 40'000 per onn.