L’onn passà ha la citad da Cuira survegnia la lubientscha dal chantun d'introducir ina scola da talents davent da l’onn da scola 2016/17. Quai ha procurà per bleras discussiuns tar ils responsabels da la scola da talents a Glion, l'emprima scola da quai gener el Grischun fundada l’onn 2009. Els temevan che la nova scola a Cuira prendia davent ad els bleras scolaras e scolars. Ina tema betg giustifitgada.
18 talents admess als examens da recepziun
Actual frequentan 40 uffants la scola da talents a Glion. Per l’onn da scola 2016/17 èn 18 talents admess als examens da recepziun. Il manader da la scola da talents a Glion, Daniel Halser, quinta che 10 enfin 12 scolaras e scolars passan ils examens. Perquai che circa il medem dumber banduna la fin da l’onn la scola da talents, vegn il dumber total a restar tar plus minus 40 uffants. Per Daniel Halser è quai nagin problem, damai che la scola è gia a la limita dal dumber da talents. Cun dapli uffants patiss la qualitad da la scola.
Collavuraziun cun Cuira ed autras scolas
L’interess per in plaz en ina scola da talents è grond. Daniel Halser beneventa perquai schizunt la purschida da la scola da talents a Cuira. Quai dettia a dapli talents grischuns la pussaivladad da frequentar ina tala scola. El spera da collavurar egl avegnir cun la scola a Cuira, per savair megliurar la qualitad da la scola a Glion.
Organisaziun tetgala per las scolas da talents
Era ina collavuraziun tranter tut las 4 scolas da talents grischunas, sper Glion e Cuira datti anc ina a Tavau ed ina a Champfèr, è ina finamira da Daniel Halser. In concept per ina organisaziun tetgala cul num «Grischa talents» saja gia sin maisa ed emprims discurs preliminars hajan gia gì lieu. Sche tut giaja sco planisà, savess la nova organisaziun tetgala entschaiver cun sia lavur entschatta dal proxim onn da scola.