Siglir tar il cuntegn

Surselva Scola da talents Cuira - concurrenza per quella da Glion

La scola da talents a Glion exista dapi 7 onns. Ella mira sceptic sin quella nova purschida en la chapitala, ni ditg auter, sin quella concurrenza da Cuira.

Giuvenils dattan ballape
Legenda: Talents d'ir cun skis, da judo, da patinar e da ballape mo era da musica audan tar ils scolars da la scola da talents. RTR, L. Livers

La regenza dal chantun Grischun ha approvà in concept che lubescha a la scola da la citad da Cuira d’introducir classas da talents. Il concept prevesa var 100 scolaras e scolars per quellas classas.

La scola da talents da Glion ha quest onn 40 scolaras e scolars. Da quai èn 30 scolars da Cuira e conturn. Ord quai motiv vesa Silvio Dietrich, il manader da scola da Glion, quai sco ina gronda frida per la scola da talents.

Atgnas fermezzas

I haja num sa concentrar sin las atgnas fermezzas per surviver. Ina da quellas fermezzas saja, che la grondezza da la scola da talents da Glion lubeschia als scolars blera individualitad. In ulteriur avantatg saja la nominaziun da la scola sco ina da las 12 meglras scolas da talents da la Svizra. Ina nominaziun, che n’avess betg savì vegnir en in meglier mument. Questa nominaziun saja sco balsam sin la frida, che Cuera avria ina atgna scola da talents.

Parallelas cun la scola da tgira?

La tema gronda che regia en Surselva è, ch'i pudess ir cun la scola da talents sco cun la scola da tgira a Glion. La scola da tgira era, sco quella da talents, la pli veglia dal Grischun. Ella ha stuì ceder perquai ch’igl è vegnì bajegià a Cuira in center per la scolaziun da persunal da tgira. En quai truclet na vulan els dentant betg vegnir mess, manegia Gieri Martin Tschuor, in scolast da classa e promotur da la scola da talents da Glion.