Siglir tar il cuntegn

Header

Fotografia gronda da la fatschada da la scola media mercantila a Glion.
Legenda: La scola media mercantila sa chatta en las localitads da la claustra dominicana sur Glion. RTR, L. Livers
cuntegn

Surselva Scola media mercantila a Glion sin chommas falombras

Il Center da furmaziun Surselva a Glion ha problems cun il dumber da novas scolaras e novs scolars. Per la scola media mercantila è s'interessada mo 1 persuna.

Dapi plirs onns ha il Center da furmaziun Surselva a Glion adina puspè da cumbatter cun il dumber da scolaras e scolars. Il center che porscha scolas medias, scolas commerzialas e scolas industrialas, senta la depopulaziun da las vals sursilvanas. Cunzunt la scola media mercantila ha ils davos onns adina gì pli e pli paucs interessents. Per il nov onn da scola 2015/16 è s'annunziada enfin uss mo 1 persuna.

Maturitad professiunala en 4 onns

Tenor il manader dal Center da furmaziun Surselva, Curdin Tuor, è cunzunt la concurrenza entras la scola commerziala gronda.

Curdin Tuor en ses biro, che lavura vid in computer.
Legenda: Curdin Tuor, il menader dal Center da furmaziun Surselva. RTR, C. Albin

Cuntanscher la maturitad professiunala en la scola media mercantila cuzza 4 onns (3 onns scola ed 1 onn praticum). En la scola professiunala profil M cuzza quai mo 3 onns. Ord quest motiv blers che sa decidan per la scola professiunala.

Scola media spezialisada ha success

Avant 1 onn ha il Center da furmaziun perquai vulì midar la scola media mercantila en ina scola media spezialisada d’informatica. Scolas medias spezialisadas han dapli success e l'interess era dà. Il Cussegl grond n'ha dentant betg lubì questa midada. Uschia ha Curdin Tuor planisà da porscher la scola media mercantila cun informatica sco rom lateral. La decisiun da far quai è dentant crudada memia tard per anc attrair avunda scolaras e scolars. Per l'onn da scola 2016/17 èn gia s’annunziadas 6 persunas.

Restar averts per alternativas

Tenor Curdin Tuor sto il Center da furmaziun Surselva restar flexibels e sviluppar novas purschidas. Era na dastgia el betg mantegnair per tut pretsch purschidas da scolaziun che sajan antiquadas. Mo uschia saja pussibel da mantegnair la scola a Glion. Il problem da la depopulaziun da las vals sursilvanas na vegnia betg pli pitschens en il futur.

Artitgels legids il pli savens

Scrollar a sanestra Scrollar a dretga