Sco quai che Marcel Suter da l’Uffizi da migraziun a ditg a Radiotelevisiun Svizra Rumantscha, cuzzass la transfurmaziun da la scola a Rueras en ina dimora per requirents d’asil almain in mez onn. Perquai ch’il chantun haja objects a disposiziun che dovrian damain lavurs e possian uschia dar pli svelt suttetg a requirents d’asil, hajan quests prioritad.
Anc betg giu da maisa
Marcel Suter ha dentant punctuà, che la scola da Rueras na saja insumma anc betg giud maisa. Ins persequiteschia vinavant quest project ed elavureschia ils plans necessaris. «Igl è in novum che vischnancas fan amogna in object e nus essan fitg leds persuenter» di Marcel Suter. La vischnanca da Tujetsch aveva fatg amogna l’object al chantun sco dimora per requirents d'asil, suenter ch'ils vischins da Rueras avevan approvà la chaussa.