La scola da Tujetsch ha ina nova mainascola - Sabrina Suppiger-Hendry. Ella remplazza Gian-Reto Nufer ch’ha midà ses plaz da lavur a Mustér, nua ch'el maina il center da sanadad Puntreis. Sabrina Suppiger-Hendry è oriunda da la Val Tujetsch ed ha abità ils ultims onns a Teufen en il chantun Appenzell Dadora (AR). Dapi sis emnas abita ella cun sia famiglia a Sedrun.
Adia Appenzell – ciao Tujetsch
En sasez n’èsi betg stà il plan da Sabrina Suppiger-Hendry da turnar en la patria – ma ils dus inserats da plazza en la gasetta locala «La Tuatschina» avevan persvadì ella e ses um Maurus Suppiger ch’è medemamain scolast superiur. Cunquai ch'ils dus figls na van betg anc a scol, saja stà ina buna chaschun da far ussa il pass. Uschia ch’igl è stà plitost ina decisiun spontana. Durant la stad han els perquai prendì satg e pac ed han bardiglià en la nova abitaziun a Sedrun.
Nus avain ditg in a l'auter: Sche nus vulain turnar ina giada, lura fiss ussa la meglra pussaivladad.
Dapi sis emnas abitan els ussa en lur nov dachasa. Cun spassegiar tras il vitg u cun visitar la scola nua ch’ella ha passentà sezza sia uffanza, sajan immediat puspè las regurdientschas da pli baud stadas preschentas. Ella sa legria ussa fitg sin il futur e la nova sfida.