Siglir tar il cuntegn
Inhalt

Surselva Scolars chinais al gimnasi da Mustér

Novs accents al gimnasi e l’internat da la claustra da Mustér. 5 fin 10 scolaras e scolars da la China vegnan a frequentar l'atun il gimnasi curt, vul dir 4 onns fin la matura. Quest program integrativ da furmaziun succeda en collavuraziun cun la fundaziun svizra Bildungsanker.

Gimnasi da la claustra da Mustér
Legenda: Gimnasi da la claustra da Mustér ANR, H. Huonder

Las giuvnas ed ils giuvens chinais èn vegnids selecziunads per quest program. Represchentants da la fundaziun Bildungsanker èn stads en China ed han fatg intervistas cun els ed era cun lur geniturs. Els han guardà, tge scolas che han in bun rang internaziunal, e tge scolars che han il potenzial da frequentar ina scola en l'exteriur, ha il rectur dal gimnasi da la claustra da Mustér Bruno Hensler ditg.

Zen-Jiang Wang da la fundaziun Bildungsanker.
Legenda: Zen-Jiang Wang da la fundaziun Bildungsanker. ANR, H. Huonder

Per preparar quest program va era ina delegaziun dal gimnasi da Mustér la stad en China. Els visitan ils geniturs dals giuvenils ed era lur scolas, per ex. a Beijing, Nanjing e Shanghai. La scolaziun ed integraziun da quests giuvenils cumenza la stad. Suenter ch’els han absolvì in curs d’introducziun da 2 emnas al gimnasi, ston els far ina scolaziun intensiva en tudestg. Englais discurran els gia, sco Bruno Hensler di.

Padrins, vul dir scolars indigens, tgiran las scolaras ed ils scolars chinais. La finamira è era da tgirar contacts, per exempel ch’ils indigens envidan els a chasa. Uschè duessan omadus partenaris emprender d’enconuscher la cultura estra.

Andreas Kühnis, in anteriur scolar dal gimnasi da Mustér ed expert per qualificaziuns interculturalas, accumpogna il program.