Siglir tar il cuntegn

Header

Ils scolars da Tujetsch en la sala dal Cussegl naziunal a Berna.
Legenda: Ils scolars da Tujetsch ch’han fatg politica a Berna. mad
cuntegn

Surselva Scolars da Tujetsch sco cussegliers naziunals

Durant in'emna da project han scolars da tschintg scolas Svizras fatg politica a Berna. Els han lantschà in'iniziativa dal pievel, han creà cumissiuns predeliberantas e fundà partidas. Era da la partida il stgalim superiur da la scola da Tujetsch.

Il project sa numna «Scolas a Berna». Durant in'emna da project survegnan ils scolars dal stgalim superiur invista co la politica en Sivzra funcziuna. Cun sez giugar tras ils differents pass dad ina iniziativa dal pievel vegn mussà si, co la populaziun svizra po sez s'engaschar en la politica.

Ils scolars da Tujetsch han lantschà ina iniziativa che vul far fin cun l'abus cun raps da l'agid social. Els han damai scritg il text da lescha, rimnà suttascripziuns e dà giu quellas a la Chanzlia Federala. En pli han els creà cumissiuns predeliberantas e fundà ina partida.

Sessiun sco punct culminant

Sco finiziun da l'emna da project han las 5 classas giugà tras ina sessiun dal Cussegl naziunal. Mintga scolar era damai sez per in suentermezdi cusseglier naziunal en la Chasa Federala a Berna.

Giuvnas e giuvens che tegnan si il maun.
Legenda: Ils scolars decidan davart ina dumonda. mad

L'iniziativa da la partida rumantscha grischuna da Tujetsch è cun be ina vusch vegnida refusada. Clar ch'ils scolars eran trumpads. L'experientscha dad esser stà per in suentermezdi cusseglier naziunal e da vesair sco che la politica funcziuna propi era dentant pli importanta, han ils scolars ditg suenter la sessiun ad RTR.

Artitgels legids il pli savens

Scrollar a sanestra Scrollar a dretga