Trin è ina vischnanca ch’ins po anc quintar tar l'aglomeraziun da Cuira. Ils davos onns è Trin vi da crescher, e cun la blera glieud che vegn là ad abitar pudess ins pensar ch'il rumantsch vegnia sut squitsch. Cun la scola bilingua procura la vischnanca per in bun fundament dal linguatg.
Pretensius
Cun blers uffants che na vegnan betg ord famiglias rumantschas èsi pretensius d’instruir quest linguatg. Tuttina cuntanschan ils uffants che frequentan la scola primara a Trin in bun nivel linguistic enfin ch’els bandunan la scola.
Ils uffants san segir tschantschar e s’exprimer detg bain. Els èn abels da far entiras construcziuns e da manar in discurs en rumantsch. Plinavant san ils uffants era scriver rumantsch grischun.
Suenter la scola primara visitan ils uffants da Trin la scola superiura a Flem. Là pon els decider, sch’els vulan cuntinuar cun il rumantsch u sch'els vulan eleger il talian.
Rumantsch grischun
Trin ha decidì d'alfabetisar ils uffants en rumantsch grischun. Questa decisiun nagin che metta en dumonda.
Per la gronda part da noss uffants èsi tuttina, tge linguatg ch’els ston emprender. Che quai saja il rumantsch sursilvan u il rumantsch grischun. Per nus è il rumantsch grischun bunamain la meglra schliaziun. Per l’ina è quel per ils da Trin relativamain datiers al dialect da Trin, e per ils auters n’emporta quai nagut, tge idiom ch’els emprendan.
Schebain ch'ins pudess pensar, ch'il rumantsch pudess ir a perder a Trin, mussa la vischnanca che la scola bilingua ed il rumantsch grischun gidan a mantegnair il linguatg periclità.