Siglir tar il cuntegn

Header

cuntegn

Surselva Scolas Glion: Novas ideas èn dumandadas

Varianta radicala? Tut las scolas primaras rumantschas vegnan a Glion, il center Mundan daventa la scola rumantscha. Quai è ina da las variantas che la gruppa da lavur da l cussegl da scola vesa.

En las scolas da Glion datti 56 plazzas cumplainas per scolasts, persunas d’instrucziun dumbra Glion 90. En tut vegn instruids 500 scolars e scolaras e quai en sis chasas da scola. Las pajas dals scolasts e scolastas muntan a passa sis milliuns francs.

Grafica: Castrisch, Duvin, Rueun Ruschein e Glion sez en tut plazzals da scolas.
Legenda: Glion ha ina purschida da scolas cumplessiva, cun potenzial da spargnar, vul dir reducir. RTR, Grafica

Reducir ils custs per la scola è in'incumbensa ch'il parlament da Glion ha dà al cussegl da scola. Perquai ha la gruppa da lavur dal cussegl da scola da la vischnanca fusiunada da Glion, rimnà ideas e parairis tar la populaziun en las fracziuns da la vischnanca.

Provocar la discussiun

Rimnar ils parairis en las fracziuns è ina chaussa. Per provocar in zichel ha il manader da la scola da Glion Silvio Dietrich mess en discussiun la pussaivladad da vegnir cun tut las scolas a Glion, e far in center per las scolas rumantschas a Glion. Quest center da scola rumantsch pudess s'installar en il Center Mundaun cura che la Migros banduna quest lieu e retira sias novas localitads.

audio
Mezdi: Scolas rumantschas da Glion en il center Mundaun?
ord Actualitad dals 16.12.2016.
laschar ir. Durada: 3 minutas 17 Secundas.

Quai na saja betg ina proposta concreta, i saja simplamain ina da pliras pussaivladads ch'ins pudess realisar.

Sco Silvio Diertich ha detg ad RTR na saja quai insumma betg concret. Ma questa ponderaziun mussia ch'els stoppian far ponderaziuns en tuttas direcziuns avant che sa decider per ina u l’auter varianta.

Pussaivladads e betg variantas

Il pled 'varianta' na poss'ins strusch duvrar en questa fasa da l'evaluaziun - là nua che la gruppa da lavur sa chattia ussa, precisescha Annalisa Cathomas dal cussegl da scola da Glion che fa medemamain part da questa gruppa da lavur.

L'emprim cas che fa in zichel prescha pudess esser la scola superiura da Rueun. Cun l'onn 2020 n'ha questa scola betg avunda scolars pli per vinavant vegnir manada a Rueun. Insumma saja questa scola era periclitada pervia d’ina eventuala fusiun d' Andiast e Vuorz cun Breil. Sche quai succeda, havess la scola gia pli baud memia paucs scolars.

RR actualitad 12:00

Artitgels legids il pli savens