11 scolaras e scolars, 10 ord la regiun: Quai è l'actuala emprima classa dal gimnasi da la scola claustrala a Mustér. En congual cun ils onns avant saja quai la mesadad, di il rectur Tom Etter.
L’entira scola claustrala dumbra per l’onn actual 140 scolaras e scolars. Avant 10 onns eran quai anc radund 200.
37 scolaras e scolars èn en l'internat
Sco il rectur Tom Etter ha ditg, sajan quest onn 37 scolaras e scolars interns. Da quels vegnan 10 ord il chantun Tessin. Là han ils responsabels da la scola claustrala intensivà ils ultims onns las stentas per chattar scolars.
Intensivà las stentas ha la scola claustrala er sin nivel internaziunal. Il mument visitan dentant sulet trais scolaras da la Namibia ed ina da la China la scola claustrala. Ils emprims scolars da la China han fatg l’onn da scola passà la matura a Mustér.
Plans per in bus da scola
La scola claustrala vul examinar plans per meglierar a scolaras e scolars da la regiun da Flem-Laax-Falera il viadi a Mustér. Uschia datti plans per in bus spezial fin a Glion.
Sin dumonda ha Tom Etter era ditg, ch’in bus or da la Lumnezia pudessi er esser ina opziun. L’emprim stoppian ins en omadus cas examinar, sch’in basegn saja avant maun.
RR actualitad 07:00