L’areal da l’anteriur hotel Alpsu/Oberalp a Sedrun è vit dapi plirs onns. Uss vul la vischnanca da Tujetsch che la firma Prime Elements (sedia a Cham/ZG) mettia puspè en urden quest areal.
Recurs a la dretgira administrativa
Sco il nov president communal da Tujetsch, Martin Cavegn, ha ditg ad RTR, haja la suprastanza disponì ils 18 da matg che Prime Elements stoppia restructurar l’areal. Strusch in mais pli tard, mez zercladur, ha Prime Elements dentant fatg recurs a la dretgira administrativa dal Grischun. La dretgira ha confermà quai.
Durant il temp che quai vegn decidì pon ins adina puspè chattar ina schliaziun
Impurtant ch'in project vegniss realisà
La posiziun da la vischnanca da Tujetsch saja clera, sco Martin Cavegn di. U che Prime Elements presentia in nov project cun ina dumonda da bajegiar ubain che l’areal vegnia puspè mess en urden.
Nus giavischain che quest project vegnia realisà. Quai fiss impurtant per la vischnanca da Tujetsch.
Dapi prest 10 onns senza in project
Il 2011 aveva l’anteriur hotel Alpsu fatg concurs, ed in onn pli tard aveva la Prime Elements fatg la dumonda da bajegiar in project cun 4 chasas cun abitaziuns (era abitaziuns secundaras) ed in hotel. Ma il project ha gì retard, tranter auter perquai che la firma responsabla per il project, la Spectrum Sedrun Investment SA, n'aveva betg pajà lavurs gia fatgas. La finala ha la vischnanca da Tujetsch betg pli prolungà la lubientscha da bajegiar. Encunter questa decisiun ha la firma fatg recurs fin a la Dretgira federala a Losanna, dentant senza success.
La Prime Elements, respectiv l'architect Thomas von Allmen, ha respundì a las dumondas da RTR mintgamai cun in: «Nagin commentari».