Ina dunna è ida a spass cun ses chaun sin ina via da quartier a Sedrun sonda saira suenter las 23:00. Tuttenina hai dà in schlop ed il chaun che passava avant ella vi da la corda è crudà a funs. La possessura ha avisà la Polizia chantunala dal Grischun. Quella ha chattà en la medema notg in abitant da 79 onns. El ha dà tiers d’avair sajettà sin il chaun. Ensemen cun la Procura publica dal Grischun sclerescha la Polizia chantunala en collavuraziun cun ils organs da surveglianza da chatscha las circumstanzas exactas da quest incap.
La FMR ha discurrì cun l'um ch'ha sajettà il chaun. El n'haja betg gì dubi ch'i sa tractia d'ina vulp. El n'haja betg vulì sajettar in chaun e la possessura n'haja el betg vis en il mument dal sajet.
Betg l'emprim cas da chatscha da lajetg
Actualmain è en Grischun chatscha da lajetg. Durant la notg vegnan sajettads per exempel vulps, tais ubain fiergnas. Avant ch'il perspectiv da mira era introducì e lubì vegniva questa chatscha cunzunt fatga da notgs cun buna glina. Cun il perspectiv è la chatscha dentant er pussaivla da notg, i dovria però blera experientscha e buna concentraziun da giuditgar l'animal. Igl è gia capità diversas giadas ch'in chatschader ha sajettà in animal betg lubì. Uschia per exempel ha in chatschader en Surselva sajettà durant chatscha da lajetg il 2016 in schacal mellen, quai è in animal che sumeglia ina vulp ma è in zic pli grond. Era lufs èn gia vegnids sajettads, uschia il 2014 en Tumleastga ed il 2018 en il Vallais.
Er chauns èn gia crudads durant la chatscha nocturna. Uschia per exempel il 2017 a Claustra. Lura aveva in chatschader sbaglià l'animal e sajettà in chaun che gieva libramain enturn. L'onn passà è quai er capità en il Vallais, in survegliader da chatscha ha sajettà per sbagl in chaun da protecziun. Quels cas han ils uffizis da chatscha mintgamai confermà. Ultra da quai sa la FMR d'in cas en Surselva nua ch'in chatschader aveva sajettà l'agen chaun durant chatscha da lajetg. Sco l'um ha ditg era quai capità avant 35 onns, lura erian ils vitg bler pli stgirs che oz, uschia ch'el haja sbaglià ses chaun cun in animal selvadi.
