Per la segunda ediziun dals dis da schlagher a Sedrun han ils organisaturs fatg intginas adattaziuns. Las duas midadas impurtantas èn tenor Stefan Birri dal comité d’organisaziun:
- La tenda da festa vegn engrondida. Quai vul dir, che quest onn datti plaz per fin 2'000 persunas. Quella dal 2016 aveva lieu per 1'600 persunas ed era arrivada als cunfins da sia capacitad. Plinavant duai vegnir construida quest onn ina tribuna pli gronda.
- I dat in bus gratuit che cursescha tranter Cuira e Dieni, nua che la tenda vegn installada.
Oldtimers ed ina tenda da biera
Impurtant saja da crear ina buna atmosfera. Els veglian vegnir davent dal maletg ch’i dettia schlaghers mo en ina tenda da biera. Perquai investeschian els bler en la decoraziun ed en l’ambient. Els hajan per exempel in club dad oldtimers che exponia lur vehichels ed els fetschian in'ustaria da biera, di Stefan Birri.
Dal retg da Mallorca enfin a Michelle e Ross Antony
Er per l’ediziun da 2017 han ils organisaturs pudì engaschar persunas enconuschentas ord la scena da schlagher sco Vanessa Mai, Jürgen Drews, Michelle, Lorenz Büffel ubain Ross Antony. Gia da mez avust hajan els vendì passa la mesadad dals bigliets, uschia Birri, che lavura tar la MB Mountain Events GmbH a Turitg.
RR actualitad 08:20