Igl è gia la segunda giada che la Prime Elements tira ina decisiun da la vischnanca da Tujetsch avant il Tribunal federal. L’emprima giada il 2018 aveva l’interpresa gia pers avant dretgira. Crap da stgarpitsch era la decisiun da la vischnanca da betg pli prolungar la dumonda da construcziun, suenter che quella era gia vegnida prolungada trais giadas. Sinaquai aveva la vischnanca decis en ina disposiziun che l’areal stoppia vegnir mess en il stan original. Cunter quella decisiun era l’interpresa ida avant dretgira ed ha pretendì in effect da suspensiun, quai che la vischnanca n’ha betg acceptà. Uss è quella decisiun in cas per il Tribunal federal.
Nov project inoltrà n'ha betg pudì vegnir lubì
L’interpresa dal chantun Zug ha en quest fratemp inoltrà in'ulteriura dumonda da bajegiar, per in sumegliant project. La vischnanca da Tujetsch n’ha tenor indicaziuns dal president communal Martin Cavegn betg pudì dar quella lubientscha ord differents motivs. Era quest fatg è vegnì fatg valair avant dretgira. Perquai vul l’interpresa Prime Elements era betg metter en urden l’areal, quai ch’il Tribunal federal ha uss da decider. La Dretgira administrativa ha argumentà en la decisiun dal favrer 2022 che la situaziun da metter en urden l’areal n’haja da far nagut cun la dumonda da construcziun e stoppia en tutta cas vegnir fatga. Anc circa in'emna ha l’interpresa la pussaivladad da trair vinavant la decisiun a la proxima instanza, sch'ella na fa betg quai, sto ella spazzar ils stabiliments da garascha e tschalers gia realisads il 2014.
L'istorgia da dretgiras è lunga
Avant passa 10 onns è l'hotel Oberalp a Sedrun vegnì stgarpà giu. Planisà era da realisar sin quest areal quatter chasas. Duas fissan stadas planisadas sco hotel, ina sco chasa per studios da hotel ed ina chasa cun en set abitaziuns da vacanzas. La lubientscha da construcziun era vegnida surdada il 2012. Ma l’interpresa n’ha betg realisà il project. La lubientscha da construcziun è vegnida prolungada pliras giadas, fin che la vischnanca n’ha betg pli prolungà quella il 2018. Cunter questa decisiun da la vischnanca è l’interpresa domiciliada en il chantun Zug ida fin al Tribunal federal a Losanna. Lez ha en ina decisiun dal fanadur 2019 refusà quest recurs e dà raschun a la vischnanca. Sa basond sin questa sentenzia ha la vischnanca lura decis ils 18 da matg 2020 la disposiziun che l’areal stoppia vegnir mess en urden.
