Per Sedrun-Mustér Turissem èsi impurtant da betg mo far reclama cun las purschidas mabain era cun la lingua rumantscha. La directura Simona Barmettler di che quai saja insatge spezial ch'ins duai er pudair mussar e promover.
La reclama da Sedrun-Mustér Turissem vegn fatga da l’organisaziun Andermatt-Sedrun-Disentis marketing e betg pli da Grischun Vacanzas. Quella ha lantschà ina campagna cun differents temas da paisa. Per exempel vegn tematisada la tur da signal sin il pass Alpsu, la claustra da Mustér, sco era la lingua e cultura rumantscha. Ma surtut duai vegnir promovì il sport da bike en la regiun.
Investì bler en la sparta bike
En il Grischun sajan ins en la situaziun ideala ch’ins haja ina gronda rait da vias da viandar e sin bunamain tut quellas vias possian ins era ir cun velo, di Simona Barmettler. E qua hajan ins investì ils ultims onns. Uschia sajan vias vegnidas fatgas pli grondas ed il resun saja bun, surtut era da las viandantas ed ils viandants. Las destinaziuns pitschnas possian dentant profitar da la gronda lavur era da Grischun Vacanzas per ina buna convivenza sin las sendas, qua sajan ins fitg lunsch en il Grischun e quai pussibiliteschia in grond svilup era per la destinaziun da Sedrun-Mustér cun Andermatt.
Campagna cuntinuescha
La campagna da reclama cuntinuescha l’enviern proxim, ma era la proxima stad vegnan ins vinavant a tematisar ils temas da paisa. Tar quels s’auda era la lingua rumantscha, ma era auters temas autentics. I na fetschia betg senn da far reclama per exempel cun la pli lunga pista, quai hajan tuts, argumentescha Simona Barmettler. Ma singularitads sco la lingua rumantscha e la cultura indigena, u era las attracziuns gia dadas, sco il lai da Tuma, quellas stoppian ins promover e far publicas. Quai saja l’intenziun da questa campagna.