Siglir tar il cuntegn

Header

cuntegn

Surselva Sedrun Mustér Turissem: Roeschlin n`è betg pli en suprastanza

En suprastanza da SMT datti in vacum: la vischnanca da Tujetsch n’è betg pli represchentada. Il president Beat Roeschlin è sortì ils 10 da november.

La lavur saja fatga, l’organisaziun e las structuras novas da Sedrun Mustér Turissem stettian, di il president communal da Tujetsch Beat Roeschlin.

Beat Roeschlin.
Legenda: RTR, Gion Hosang
Uss èsi impurtant ch’i vegn depolitisà. Igl è er impurtant ch’il SMT fa quests pass…
Autur: Beat Roeschlin

El na possia betg esser en duas suprastanzas – quai saja ina cumulaziun d'uffizis e perquai dettia quai conflicts d'interess. SMT stoppia vegnir depolitisà e l’uniun stoppia far il pass ad ina societad d’aczias cun integrar las pendicularas ed ils represchentants locals dal turissem.

Nagins conflicts d'interess

D’autra opiniun è il president communal da Mustér, Francestg Cajacob. Per el na dettia quai betg conflicts d'interess e perquai stettia el vinavant en suprastanza da Sedrun Mustér Turissem fin ch’il nov president Robert Cajacob surpiglia quest’incumbensa il 2018.

Dialog e lavur constructiva cun Tujetsch

Beat Roeschlin avess gì gugent che la nova societad d'aczias fiss gia vegnida instradada la primavaira 2017.

L'entrada dal biro da SMT a Sedrun
Legenda: L'entrada dal biro da SMT a Sedrun. RTR, Hubert Giger

Mo il president da SMT Curdin Brugger di ch’els hajan vulì preschentar ina schliaziun concreta als commembers da SMT. Perquai hajan els mess quest tema sin la radunanza generala da 2017 (quella è probabel l'atun). Plinavant di el ch’els giavischian il dialog e la lavur constructiva cun la vischnanca da Tujetsch. El haja communitgà ad in suprastant ch’i fiss bun sch’in dad els vegniss en suprastanza da Sedrun Mustér Turissem.

RR novitads 16:00

Artitgels legids il pli savens