Plinavant ha il cussegl d'administraziun approvà la nova carta da giasts che vala a partir da la stad proxima. Quella è vegnida concepida ensemen cun «Andermatt Val d'Ursera Tourismus» e la Andermatt Sedrun Mustér Marketing SA. Uschia hajan ins uss ina carta unifitgada per l'entira regiun, scriva l'interpresa en ina communicaziun.
Da nov datti per ils osps l'opziun da cumprar in supplement per la carta d'osps gratuita, lura poni far diever da tut las pendicularas senza restricziuns. Possessurs d'ina segunda abitaziun han davent da questa stad la pussaivladad da cumprar ina carta d'osps per l'entira stagiun da stad.
600 tests da corona
Ils centers da test da corona, che la Sedrun-Mustér Turissem SA ha inizià ensemen cun ils medis locals, èn vegnids duvrads frequentamain. Tranter ils 20 da december ed ils 7 da schaner èn vegnids fatgs radund 600 tests a Mustér ed a Sedrun. Ils centers èn anc en funcziun fin la fin da schaner. Il mument vegnia examinà la pussaivladad da cuntinuar enfin la fin da la stagiun d'enviern.